Ratan Tata: చిన్న కారుతో సంచలనం.. రతన్ టాటా హయాంలో ఏర్పాటు చేసిన కంపెనీల జాబితా
Ratan Tata: చిన్న కారుతో సంచలనం.. రతన్ టాటా హయాంలో ఏర్పాటు చేసిన కంపెనీల జాబితా
• చిన్నకార్లతో మిడిల్ క్లాస్ కల సాకారం- ఆటోమొబైల్ ఇండస్ట్రీపై టాటా మార్క్
• ఆటోమొబైల్ ఇండస్ట్రీకి రతన్ టాటా విశిష్ట సేవలు- టాటా నానో కార్తో సంచలనం
• 1991 నుంచి 2012 వరకు 21 ఏళ్లపాటు టాటా గ్రూప్ చైర్మన్గా వ్యవహరించిన రతన్ టాటా
• ఆయన హయాంలో 30కి పైగా కంపెనీల ఎదుగుదల
• అనేక బ్రాండ్లను ప్రపంచ స్థాయికి తీసుకెళ్లిన భారతీయ వ్యాపార దిగ్గజం
• ఓ కుటుంబ ప్రమాదకర ప్రయాణం - లక్ష కారుతో గెలుపు పాఠం
రత్నాలైనా కఠినంగా ఉండచ్చేమో కానీ రతన్ టాటా మనసు మాత్రం వెన్న. ఉక్కు కొలిమిలో పనిచేసిన రాటుదేలిన ఆయనలో ఓ మృదువైన కోణం ఆవిష్కృతమైంది. కేవలం ఉన్నత వర్గాల ముచ్చట తీర్చిన రతన్ టాటా మధ్యతరగతి వర్గాల ముచ్చట తీర్చాలని నిర్ణయించారు. ఆ క్రమంలోనే వారికి ఓ విలువైన కానుక ఇచ్చారు. అలా ఆయన ఆలోచనల నుంచే ఓ లక్షణమైన లక్ష కారు వచ్చేసింది. అదే 'నానో' కారు. ఓ వర్షం కురిసిన రాత్రి ముంబయిలో ఓ కుటుంబం చేసిన ప్రమాదకర ప్రయాణం ఆయన స్మృతిపథం నుంచి చెరిగిపోలేదు. ఆ ఆలోచనల నుంచి పుట్టిందే ఈ నానో కారు. గుజరాత్లోని సనద్లో టాటా మోటార్స్ యూనిట్లో తయారైన ఈ కారు దేశమంతా దుమ్మురేపింది. విదేశాలకు కూడా ఎగుమతి అయ్యింది. రతన్ టాటా నానో కారు దేశవిదేశాల్లో అనేక బిజినెస్ స్కూళ్లలో గెలుపుపాఠంగా సిలబస్లో చేరింది.
కలల కారుమేఘాల్లో విహరించాలనే మధ్యతరగతి వారి ముచ్చట తీర్చాలని రతన్ టాటాకు చిరకాల కోరిక. అందుకే వారి అభిరుచికి తగ్గట్లుగా అందుబాటు ధరలోనే ఓ పూర్తి స్వదేశీ కారు తేవాలని ఆయన అభిలాష. అలాంటి ఆలోచనల నుంచే ఆవిష్కృతమైందే రతన్ టాటా మానసపుత్రిక 'టాటా ఇండికా'. సింపుల్గా, ఓ ఫ్యామిలీకి తగ్గట్లుగా డిజైన్ చేసిన ఈ కారును ఆ సంస్థ గ్రాండ్గానే లాంఛ్ చేసింది. కానీ అప్పటి మార్కెట్ ట్రెండ్స్లో కాస్త డీలా పడింది. దీంతో తొలి ఏడాదే ఆ సంస్థకు కొన్ని వందల కోట్ల నష్టాలు వచ్చాయి.
ఆ సమయంలో కంపెనీ డైరెక్టర్లు కొందరి సలహా మేరకు 'ఇండికా'ను ఫోర్డు కంపెనీకి విక్రయించాలని రతన్ టాటా నిర్ణయించారు. అలా టాటా ప్రతినిధి బృందంతో డెట్రాయిట్ వెళ్లి చర్చలకు కూడా కూర్చున్నారు. అయితే అక్కడ ఆయన్ను ఫోర్డు కంపెనీ ఛైర్మన్ ఎగతాళిచేశారు. "అనుభవం లేనిదే ప్యాసింజర్ కారు తయారీకి తగుదునమ్మా అంటూ దిగారు" అని అన్నారు. "మీ కారు బ్రాండును కొనటం ద్వారా మేము మీకు గొప్ప మేలు చేస్తున్నాం" అని చులకనగా మాట్లాడారు. దీంతో రతన్ టాటా ఆ చర్చలను అంతటితో ముగించి ఎటువంటి ఒప్పందం చేసుకోకుండానే స్వదేశానికి తిరిగి వచ్చేశారు. అయినప్పటికీ కారెక్కాలన్న మధ్య తరగతి ముచ్చటను తీర్చడంలో రతన్ టాటా ఏమాత్రం రాజీపడలేదు.
అవమానించిన వ్యక్తికి సాదర ఆహ్వానం
2008లో ప్రపంచాన్ని ఆర్థిక మాంద్యం కమ్మింది. ఆటోమొబైల్ రంగంలో పేరుగాంచిన ఫోర్డు కంపెనీ గిజగిజలాడింది. ఎవరు కొంటారా అంటూ జాగ్వార్, ల్యాండ్ రోవర్ల ఉత్పత్తి కేంద్రాలను విక్రయించాలని నిర్ణయిచింది. సరిగ్గా అదే సమయంలో రతన్ టాటా రంగప్రవేశం చేశారు. 'అనుభవం లేదు కార్ల తయారీలోకి ఎందుకొచ్చావు?' అని తనను అవమానించిన ఫోర్డు కంపెనీ ఛైర్మన్ను ముంబయికి సాదరంగా ఆహ్వానించి బంపర్ ఆఫర్ ఇచ్చారు. అలా జాగ్వార్, ల్యాండ్ రోవర్లను $1.2 బిలియన్ డాలర్లకు కొనుగోలు చేశారు. నాడు మాట జారిన ఫోర్డు చైర్మన్ మీద రతన్ టాటా తీయగా ప్రతీకారం తీర్చుకున్నారంటూ ఆర్ధిక విశ్లేషకులు చెణుకులు విసిరారు.
అయితే ఆర్థిక మాంద్యం కమ్మినా టాటా మోటార్స్ జాగ్వార్, ల్యాండ్ రోవర్ల కొనుగోలుతో ఖరీదైన తప్పిదం చేసిందంటూ మార్కెటింగ్ నిపుణుల విశ్లేషణలను కార్ల ప్రియుడు, కార్లబఫ్గా పేరున్న రతన్ టాటా ఖాతరు చేయలేదు. దీంతో జాగ్వార్, లాండ్రోవర్ కొత్త మోడల్స్తో విక్రయాల్లో దూసుకెళ్లింది. టాటా మోటార్స్కు కామధేనువుగా మారింది. చైనాలో టాటా కంపెనీకి వచ్చే టర్నోవర్లో 50శాతం ఆటోమొబైల్ వ్యాపారం నుంచే వస్తోంది. ఈ బ్రాండ్లు అనేక దేశాల్లో ఆదరణ పొందాయి. అందులో జాగ్వార్, ల్యాండ్ రోవర్ వాటానే ఎక్కువ ఉండటం విశేషం.
చిన్న కార్లు బెస్ట్ సెల్లర్లు
2001 నాటికి టాటా ఇండికా, టాటా విస్తా, ఆ తర్వాతి కాలంలో క్వాడ్రజెట్ ఇంకా అనేక మోడళ్లతో చిన్నకార్లు మార్కోట్లోకి వచ్చి దేశంలో బెస్ట్ సెల్లర్గా నిలిచింది. స్పోర్ట్స్ యుటిలిటీ వెహికిల్ (SUV) మోడల్లో 1991లో టాటా సియారా భారతీయ రహదారులెక్కింది. ఇది విజయవంతమైన ఉత్సాహంతో దూసుకొచ్చాయి. 1994లో టాటా మోటార్స్ మాజీ ఎండీ సుమంత్ మూల్గావ్కర్ పేరుతో టాటా సుమో వాహనాన్ని మార్కెట్లో ప్రవేశపెట్టారు. దేశవిదేశాల నుంచి టాటా సుమో కోసం భారీ ఆర్డర్లు వచ్చాయి.
1998లోనే టాటా సఫారీ SUVలు దుమ్మురేపుతూ వచ్చేశాయి. హుందాయ్లు, హోండాలు, జెన్ల పోటీలో నిలిచి స్వదేశీ జనుల మనసు చూరగొనే మోడల్స్ తయారు చేసి మార్కెట్లో నిలబెట్టారు. అవి వినియెగదార్లకు సూపర్గా నచ్చేశాయి. అప్పటికే మనదేశంలో మారుతి జెన్, మారుతి వ్యాగనర్, హుందాయ్ శాంట్రో లాంటి కారులు పోటీగా బారులు తీరాయి. సరిగ్గా ఇలాంటి సమయంలో రతన్ టాటా దిశానిర్దేశం, పర్యవేక్షణలో టాటా ఇండికా-V2 వచ్చి సూపర్ హిట్ అయ్యింది. ఇదే దారిలో మరికొన్ని మోడల్స్ తీసుకొచ్చారు.
ట్రావెల్ కార్లంటేనే టాటా ఇండిక్యాబ్!
అప్పటి నుంచి ఇప్పటివరకూ ట్రావెల్ కార్లంటేనే టాటా ఇండిక్యాబ్ అన్నంతలా ఒక బ్రాండయ్యింది. ఫ్యామిలీ కారుగానూ ఇది బాగా విక్రయమైంది. రెండేళ్లకే అగ్రశ్రేణికి ఎదిగింది. మరోవైపు అంతర్జాతీయంగానూ టీసీఎస్ 100 బిలియన్ డాలర్ల కంపెనీగా మారింది. 2003లో ఈ కంపెనీ $ 100 బిలియన్ డాలర్ల ఆదాయాన్ని సాధించిన తొలి భారతీయ ఐటీ కంపెనీగా ఘనత సాధించింది.
సాహసోపేతమైన నిర్ణయం- ఆధునిక సాంకేతికతతో కంపెనీ పునర్మిర్మాణం
ఇదిలా ఉండగా, ప్రపంచీకరణ నేపథ్యంలో పారిశ్రామిక సామ్రాజ్యాలు అప్రమత్తంగా ఉండాల్సిన అవసరాన్ని రతన్ టాటా గుర్తించారు. టాటాలు ప్రతిష్ఠగా భావిస్తున్న టాటా స్టీల్స్లో ప్రధాన హోల్డింగ్ కంపెనీ టాటా సన్స్ వాటా తగ్గి ప్రమాదాన్ని ఎదుర్కొంటోంది. అటువైపు మరికొన్ని కంపెనీల పరిస్థితీ కూడా ఇంతే ఉంది.
ఈ నేపథ్యంలో రతన్ టాటా ఓ సాహసోపేతమైన నిర్ణయాన్ని తీసుకున్నారు. దాని ఫలితమే టాటా గ్రూప్ 'క్యాష్ కౌ'గా, కామధేనువుగా ప్రసిద్ధిచెందిన టీసీఎస్ 2004లో పబ్లిక్ ఇష్యూకి వెళ్లింది. ఇందులో 13 శాతం వాటాను $ 1.2 బిలియన్ డాలర్లకు విక్రయించింది. ఈ ఐపీఓ ద్వారా వచ్చిన ఈ నిధులను రతన్ టాటా తన సంస్థ టాటా సన్స్ గ్రూప్ పునర్మిర్మాణానికి వెచ్చించారు. టాటా స్టీల్స్లో, టాటా మోటార్స్లో పెట్టుబడి పెట్టి టాటా సన్స్ గ్రూప్ వాటా పెంచారు. ఆధునిక సాంకేతికతతో టాటా సన్స్ గ్రూప్ ఆఫ్ కంపెనీని ఉన్నతీకరించారు.
రతన్ టాటా హయాంలో ఏర్పాటు చేసిన కంపెనీల జాబితా..
విలువలతో కూడిన వ్యాపారవేత్తగా, దాతృత్వం, దయా గుణం కలిగిన టాటా గ్రూపు గౌరవ చైర్మన్ రతన్ టాటా బుధవారం రాత్రి కన్నుమూసిన విషయం తెలిసిందే. టాటా గ్రూప్ను ప్రపంచ స్థాయిలో శక్తిమంతమైన కంపెనీగా నిలపడంలో రతన్ టాటా ఎనలేని కృషి చేసి విజయవంతమయ్యారు. నిరాడంబరమైన జీవనశైలి, దాతృత్వం పట్ల నిబద్ధతతో 1991 నుంచి 2012 వరకు టాటా గ్రూపు చైర్మన్గా వ్యవహరించారు. 21 ఏళ్ల పాటు టాటా గ్రూపునకు మార్గనిర్దేశం చేశారు. టాటా బ్రాండ్ను అంతర్జాతీయ స్థాయికి తీసుకెళ్లారు. స్వచ్ఛంద సేవా కార్యక్రమాలకు ప్రాధాన్యతనిస్తూనే జాగ్వార్, ల్యాండ్ రోవర్లతో పాటు పలు బ్రాండ్లను గ్లోబల్ స్థాయిలో టాప్ బ్రాండ్ల సరసన నిలిపారు.
ఆరు ఖండాల్లోని 100కు పైగా దేశాల్లో టాటా గ్రూపునకు చెందిన కార్యకలాపాలను ఆయన స్వయంగా పర్యవేక్షించారు. వివిధ రంగాలలో 30 కంపెనీలకు చక్కటి మార్గదర్శకత్వం వహించారు. వ్యక్తిగత సంపద పోగు చేయడం కంటే సామాజిక బాధ్యతకే ఆయన ఎక్కువ ప్రాధాన్యతనిచ్చారు. అందుకే సంపన్నుల జాబితాలో ఆయన పేరు అగ్రస్థానంలో కనిపించదు. ఆయన అంకితభావానికి ఇంతకుమించిన నిదర్శనం ఏమీ ఉండదు.
కాగా మార్చి 1991లో జేఆర్డీ టాటా నుంచి చైర్మన్గా గ్రూపు బాధ్యతలు స్వీకరించాక వివిధ రంగాలకు వ్యాపారాలను విస్తరించారు. తన పదవీకాలంలో టాటా గ్రూపు కంపెనీలను అంతర్జాతీయ సంస్థలుగా మార్చారు. టెట్లీ, కోరస్, బ్రన్నర్ మోండ్, జనరల్ కెమికల్ ఇండస్ట్రియల్ ప్రొడక్ట్స్, దేవూ వంటి అంతర్జాతీయ బ్రాండ్లను వ్యూహాత్మకంగా కొనుగోలు చేశారు. ఆయన చైర్మన్గా ఉన్న సమయంలో అనేక రంగాలలో కంపెనీలను స్థాపించడం లేదా కొనుగోలు చేయడం వంటి వాటితో విస్తరించారు.
వివిధ రంగాలలో టాటా కంపెనీలు ఇవే..
ఇన్ఫర్మేషన్ టెక్నాలజీ రంగంలో..
1. టాటా కన్సల్టెన్సీ సర్వీసెస్ (టీసీఎస్)
2. టాటా ఎలగ్జీ
3. టాటా డిజిటల్
4. టాటా టెక్నాలజీస్
ఉక్కు రంగంలో..
5. టాటా స్టీల్
ఆటో మొబైల్స్ రంగంలో..
6. టాటా మోటార్స్
7. జాగ్వార్ ల్యాండ్ రోవర్
8. టాటా ఆటోకాంప్ సిస్టమ్
రిటైల్ రంగంలో..
9. టాటా కెమికల్స్
10. టాటా కన్స్యూమర్ ప్రొడక్ట్స్
11. టైటాన్ కంపెనీ
12. వోల్టాస్
13. ఇన్ఫినిటీ రిటైల్
14. ట్రెంట్
మౌలిక సదుపాయాల రంగంలో..
15. టాటా పవర్
16. టాటా కన్సల్టింగ్ ఇంజనీర్స్
17. టాటా రియాల్టీ అండ్ ఇన్ఫ్రాస్ట్రక్చర్
18. టాటా హౌసింగ్
ఫైనాన్సియల్ రంగంలో..
19. టాటా క్యాపిటల్
20. టాటా ఏఐఏ లైఫ్
21. టాటా ఏఐజీ
22. టాటా అసెట్ మేనేజ్మెంట్
ఏరోస్పేస్, డిఫెన్స్ రంగంలో..
23. టాటా అడ్వాన్స్డ్ సిస్టమ్స్
టూరిజం, ట్రావెల్ రంగంలో...
24. ఇండియన్ హోటల్స్
25. టాటా ఎస్ఐఏ ఎయిర్లైన్స్
26. ఎయిర్ ఇండియా
టెలికమ్యూనికేషన్స్, మీడియా రంగంలో..
27. టాటా కమ్యూనికేషన్స్
28. టాటా ప్లే
29. టాటా టెలిసర్వీసెస్
ట్రేడింగ్, ఇన్వెస్ట్మెంట్ రంగంలో..
30. టాటా ఇంటర్నేషనల్
31. టాటా ఇండస్ట్రీస్
32. టాటా ఇన్వెస్ట్మెంట్ కార్పొరేషన్