Canara Bank: మినిమమ్ బ్యాలెన్స్ నిబంధన ఎత్తివేసిన ప్రముఖ బ్యాంకు
Canara Bank: మినిమమ్ బ్యాలెన్స్ నిబంధన ఎత్తివేసిన ప్రముఖ బ్యాంకు
కెనరా బ్యాంక్ సేవింగ్స్ ఖాతాల్లో మినిమమ్ బ్యాలెన్స్ పెనాల్టీ రద్దు..
అన్ని రకాల పొదుపు ఖాతాలకు ఈ నిర్ణయం వర్తింపు..
జూన్ 1, 2025 నుంచి కొత్త నిబంధన అమల్లోకి..
కోట్లాది మంది ఖాతాదారులకు ఈ మార్పుతో ప్రయోజనం..
ఇలాంటి నిర్ణయం తీసుకున్న తొలి ప్రధాన ప్రభుత్వ రంగ బ్యాంకుగా కెనరా బ్యాంక్..
ఇకపై ఖాతాలో ఎంత బ్యాలెన్స్ ఉన్నా అదనపు ఛార్జీలు ఉండవు
కెనరా బ్యాంక్ తమ వినియోగదారులకు ఒక శుభవార్త అందించింది. సేవింగ్స్ ఖాతాల్లో కనీస నిల్వ (మినిమమ్ బ్యాలెన్స్) పాటించకపోతే విధించే జరిమానాను అధికారికంగా రద్దు చేస్తున్నట్లు ప్రకటించింది. ఈ కొత్త నిబంధన జూన్ 1 నుంచి అమల్లోకి వచ్చింది. ఈ నిర్ణయంతో, కెనరా బ్యాంక్‌లో ఎలాంటి పొదుపు ఖాతా కలిగిన వారైనా ఇకపై మినిమమ్ బ్యాలెన్స్ నిర్వహించనందుకు ఎటువంటి ఛార్జీలు లేదా జరిమానాలు చెల్లించాల్సిన అవసరం లేదు. అన్ని కేటగిరీల సేవింగ్స్ ఖాతాలకు ఈ కొత్త రూల్ వర్తిస్తుందని బ్యాంకు స్పష్టం చేసింది.
ఈ మార్పుతో, దేశంలోని ప్రధాన ప్రభుత్వ రంగ బ్యాంకుల్లో కనీస నిల్వ అవసరాన్ని పూర్తిగా తొలగించిన మొదటి బ్యాంకుగా కెనరా బ్యాంక్ నిలిచింది. అంటే, ఖాతాదారులు తమ సేవింగ్స్ ఖాతాలలో ఎటువంటి రుసుములు లేకుండా జీరో బ్యాలెన్స్‌ను కూడా కొనసాగించవచ్చు. ఈ చర్య వల్ల కోట్లాది మంది పొదుపు ఖాతాదారులకు ప్రయోజనం చేకూరుతుందని, పెనాల్టీల గురించి ఆందోళన చెందకుండా తమ ఖాతాలోని పూర్తి బ్యాలెన్స్‌ను లావాదేవీల కోసం స్వేచ్ఛగా ఉపయోగించుకోవడానికి వీలు కలుగుతుందని భావిస్తున్నారు.
"జూన్ 1 నుంచి, కెనరా బ్యాంక్ కనీస నిల్వ నిర్వహించనందుకు ఎటువంటి పెనాల్టీ విధించదు. ఇది సేవింగ్స్ ఖాతాదారులందరికీ వర్తిస్తుంది" అని బ్యాంక్ సోషల్ మీడియా ప్లాట్‌ఫామ్ ఎక్స్ లో ఒక ప్రకటనలో తెలిపింది. "ఈ కొత్త విధానంతో, కెనరా బ్యాంక్ సేవింగ్స్ బ్యాంక్ ఖాతాదారులందరూ ఇప్పుడు అన్ని సేవింగ్స్ బ్యాంక్ ఖాతాలకు సగటు నెలవారీ బ్యాలెన్స్‌కు సంబంధించిన పెనాల్టీలు లేదా రుసుముల నుంచి విముక్తి పొంది, నిజమైన 'మినిమమ్ బ్యాలెన్స్‌పై పెనాల్టీ లేని' సౌకర్యాన్ని ఆస్వాదిస్తారు" అని ఆ ప్రకటనలో పేర్కొన్నారు.
గతంలో, కెనరా బ్యాంక్ పట్టణ ప్రాంతాల్లోని కస్టమర్లు రూ. 2,000, సెమీ అర్బన్ ప్రాంతాల్లో రూ. 1,000, గ్రామీణ ప్రాంతాల్లో రూ. 500 కనీస నిల్వను నిర్వహించాలని నిబంధన ఉండేది. ఈ పరిమితులను పాటించడంలో విఫలమైతే పెనాల్టీలు విధించేవారు. ఈ తాజా మార్పు విద్యార్థులు, మహిళలు, సీనియర్ సిటిజన్లు, అల్ప ఆదాయ వర్గాలకు చెందిన వారితో సహా విస్తృత శ్రేణి వినియోగదారులకు ప్రయోజనం చేకూర్చనుంది.
భారతదేశంలోని అతిపెద్ద ప్రభుత్వ రంగ బ్యాంకులలో కెనరా బ్యాంక్ ఒకటి. 2025 ఆర్థిక సంవత్సరం మార్చి త్రైమాసికంలో (Q4), బ్యాంక్ రూ. 31,496 కోట్ల ఆదాయాన్ని, రూ. 5,111 కోట్ల లాభాన్ని నివేదించింది. పూర్తి ఆర్థిక సంవత్సరానికి (FY25), బ్యాంక్ మొత్తం ఆదాయం రూ. 1.21 లక్షల కోట్లు కాగా, నికర లాభం రూ. 17,692 కోట్లుగా ఉంది