వినికిడి లోపానికి మెరుగైన వైద్య సేవలు

• రూ.15.11 కోట్లతో 63 ప్రభుత్వాసుపత్రుల్లో 'బెరా' పరికరాలు
• సదరం సర్టిఫికెట్ల జారీ మరింత సులువు
• రాష్ట్ర వైద్యారోగ్య‌ శాఖ మంత్రి సత్యకుమార్ యాదవ్ వెల్లడి

వినికిడి లోపం కలిగిన వారికి వైద్య సేవల్ని మరింత చేరువ చేసేందుకు రాష్ట్రంలోని 63 ప్ర‌భుత్వాసుప‌త్రుల్లో కొత్తగా 'బెరా' (Brainstem Evoked Response Audiometry) పరికరాలను రూ.15.11 కోట్ల వ్యయంతో సమకూర్చనున్నట్లు రాష్ట్ర వైద్యారోగ్య‌ శాఖ మంత్రి  సత్యకుమార్ యాదవ్ వెల్లడించారు. ప్రస్తుతం బోధనాసుపత్రుల్లో మాత్రమే అందుబాటులో ఉన్న ఈ పరికరాలను తొలిసారిగా 9 జిల్లా ఆసుపత్రులు, 54 ప్రాంతీయ ఆసుపత్రుల్లోనూ అందుబాటులోనికి తీసుకురావాలని సీఎం  చంద్రబాబు నాయుడు నిర్ణయించారని మంత్రి సత్యకుమార్ పేర్కొన్నారు. బెరా పరికరాల ద్వారా వినికిడి లోపం ఉన్న‌ బాధితుల‌కు సూక్ష్మ స్థాయిలో ఎంత మేరకు ఉందో వైద్యులు గుర్తించేందుకు సులువవుతుందని తెలిపారు. దీనికి అనుగుణంగా వైద్యులు అందించే చికిత్సవల్ల రోగులకు వినికిడి లోపం మరింత పెరగకుండా ఉంటుందని గురువారంనాడొక‌ ప్రకటనలో మంత్రి సత్యకుమార్ తెలిపారు. 63 అసుపత్రుల్లో 2 నుంచి 3 నెలల్లోగా అందుబాటులోనికి రానున్న ఒక్కొక్క బెరా పరికరం, ఇతర సౌకర్యాల క‌ల్ప‌న‌కు రూ.26 లక్షల నుంచి గ‌రిష్టంగా రూ.32 ల‌క్ష‌ల వ‌ర‌కు ప్రభుత్వం ఖర్చు పెడుతుందని పేర్కొన్నారు.

దివ్యాంగులకు తగ్గనున్న వ్యయప్రయాసలు

బెరా పరికరం సాయంతో 'సదరం' దరఖాస్తుదారులకు వినికిడి లోపం శాతాన్ని వైద్యులు క‌చ్చితంగా గుర్తించి సర్టిఫికెట్ల జారీకి సిఫార‌సు చేస్తారు. ప్రస్తుతం దిగువ స్థాయి ఆసుపత్రుల్లో బెరా పరికరాలు లేనందున వినికిడి లోపం కలిగిన వారు 'సదరం' కింద నిర్ధారణ పరీక్షల కోసం బోధనాసుపత్రులకు వెళ్లేందుకు అవస్థలు పడుతున్నారు. రోగులకు చికిత్స అందించడంలో ఇటువంటి పరిస్థితులు నెలకొన్నాయి. వైద్యులు వినికిడి లోపాన్ని క‌చ్చితంగా నిర్ధారించలేక రోగులను ఇతరచోట్లకు పంపుతున్నారు. ఈ పరిస్థితుల్లో కూటమి ప్రభుత్వం 'బెరా' పరికరాలను 63 ప్ర‌భుత్వాసుప‌త్రుల్లో సమకూర్చాలని నిర్ణయించడంవల్ల రోగులకు అవస్థలు వైదొలగనున్నాయి. 

జిల్లా ఆసుపత్రుల్లో...

హిందూపురం జిల్లా ఆసుపత్రి, తణుకు, టెక్కలి, ఆత్మకూరు (నెల్లూరు జిల్లా), తెనాలి, పార్వతీపురం, ప్రొద్దుటూరు, చిత్తూరు, అనకాపల్లి జిల్లా ఆసుపత్రుల్లో బెరా సౌకర్యం అందుబాటులోనికి రాబోతుంది.

కుప్పం, ధర్మవరం ఏరియా ఆసుపత్రులతోపాటు ఇతరచోట్ల కూడా...

ముఖ్యమంత్రి  చంద్రబాబు నేతృత్వం వహిస్తున్న నియోజకవర్గంలోని కుప్పం ఏరియా ఆసుపత్రిలో, రాష్ట్ర వైద్య ఆరోగ్య శాఖ మంత్రి  సత్యకుమార్ ప్రాతినిథ్యం వహిస్తున్న‌ ధర్మవరం నియోజకవర్గం ధ‌ర్మ‌వ‌రం ఏరియా ఆసుపత్రి (శ్రీ సత్యసాయి జిల్లా), ఇతర 52 ఏరియా ఆసుపత్రుల్లో ఈ బెరా పరికరాలను అమర్చనున్నారు.

పరికరం ఏర్పాటుకు తగ్గట్లు ఆసుపత్రుల్లో కొత్త వసతులు ఆదనంగా సమకూరుతాయి. ప్రత్యేకంగా సౌండ్ ప్రూప్ రూం కొత్తగా అందుబాటులోకొస్తుంది. ఇతర ఆధునిక వసతులు కూడా సమకూరతాయి.

శిశువులు, చిన్నారులకు మ‌రింత ఉప‌యోగ‌క‌రం

నొప్పిలేని సుర‌క్షిత విధానంలో త‌క్కువ స‌మ‌యంలో ప‌రీక్ష పూర్తి చేయ‌డం వ‌ల్ల శిశువులు, చిన్నారుల‌కు మ‌రింత ఉప‌యోగ‌క‌రంగా ఉంటుంది. రెండు చెవుల‌ను ఒకేసారి ప‌రీక్షించే సౌక‌ర్యం క‌లుగుతుంది. చెవుల్లో ఉన్న కణితులు, ఇన్ఫెక్షన్ వంటి సమస్యల్ని గుర్తించే సామ‌ర్ధ్యాన్ని క‌లిగి ఉంటుంది. సురక్షిత విధానంలో త్వరగా పూర్తయ్యే 'బెరా' పరీక్షల‌ విషయంలో తల్లిదండ్రులు ఆందోళన చెందాల్సిన అవసరం లేదు.