పిపిపి వైద్య క‌ళాశాల‌ల భూముల్లో వాణిజ్య కార్య‌క్ర‌మాల నిషిద్ధం
పిపిపి వైద్య క‌ళాశాల‌ల భూముల్లో వాణిజ్య కార్య‌క్ర‌మాల నిషిద్ధం
- 4 క‌ళాశాల‌ల‌కు కేటాయించిన భూముల్లో 60 ఎక‌రాల మేర‌కు త‌గ్గింపు
- వీటికి ప్ర‌భుత్వ వైద్య క‌ళాశాల మ‌రియు ఆసుప‌త్రి అని పేరు పెట్టాలి
- ఇక నుండి ప్రైవేట్ ఆయుష్ ఆసుప‌త్రుల రిజిస్ట్రేష‌న్ త‌ప్ప‌నిస‌రి
- రాష్ట్ర క్యాబినెట్ ప్ర‌ధాన నిర్ణ‌యాలు
శుక్ర‌వారంనాడు ముఖ్య‌మంత్రి నారా చంద్ర‌బాబు నాయుడు ఆధ్వ‌ర్యంలో జ‌రిగిన స‌మావేశంలో వైద్యారోగ్య శాఖ‌కు సంబంధించి రాష్ట్ర కేబినెట్ కొన్ని ప్ర‌ధాన నిర్ణ‌యాల‌ను తీసుకుంది. పిపిపి విధానంలో చేప‌ట్ట‌నున్న ప్ర‌భుత్వ వైద్య క‌ళాశాల‌ల నిర్వ‌హ‌ణ, ప్రైవేట్ ఆయుష్ ఆసుప‌త్రుల రిజిస్ట్రేష‌న్ మ‌రియు నియంత్ర‌ణ‌కు సంబంధించి వైద్యారోగ్య శాఖ ప్ర‌తిపాద‌న‌ల‌కు కేబినెట్ ఆమోదం తెలిపింది.
పిపిపి వైద్య క‌ళాశాల‌ల నిర్వ‌హ‌ణ‌పై మార్గ‌ద‌ర్శ‌కాలు
పిపిపి విధానంలో చేప‌ట్ట‌నున్న ప్ర‌భుత్వ వైద్య క‌ళాశాల‌ల నిర్వ‌హ‌ణ‌కు సంబంధించి రాష్ట్ర కేబినెట్ 6 ప్ర‌ధాన‌మైన నిర్ణ‌యాల‌ను తీసుకుంది. ఈ క‌ళాశాల‌ల‌కు కేటాయించిన భూములను ఎటువంటి వాణిజ్య‌ప‌ర‌మైన, వైద్యేత‌ర కార్య‌క్ర‌మాల‌కు వినియోగించ‌రాద‌ని కేబినెట్ స్పష్టం చేసింది. ఈ భూముల్లో 625 ప‌డ‌క‌ల ఆసుప‌త్రి, 150 యుజి మ‌రియు 24 పీజీ సీట్ల‌తో కూడిన కాలేజీ నిర్మాణం, వ‌స‌తి గృహాలు, బోధ‌న మ‌రియు ఇత‌ర సిబ్బంది నివాసాల క‌ల్ప‌న‌కు ప్రాధాన్య‌త‌నివ్వాల‌ని క్యాబినెట్ తెలిపింది. వీటితో పాటు భ‌విష్య‌త్తు అవ‌స‌రాల మేర‌కు దంత వైద్య క‌ళాశాల‌లు, న‌ర్సింగ్ క‌ళాశాల‌లు, టెలీమెడిసిన్ కేంద్రాలు, శిక్ష‌ణ కేంద్రాలు, ఆయుష్ కేంద్రాలను ఏర్పాటు చేసుకోవ‌చ్చ‌ని కేబినెట్ నిర్ణ‌యించింది. ఈ అద‌న‌పు అభివృద్ధి చ‌ర్య‌ల ద్వారా వ‌చ్చే ఆదాయంలో 3 శాతం ప్ర‌భుత్వానికి చెల్లించాల్సి ఉంటుంది.
భూ కేటాయింపుల్లో కోత
మొద‌టి ద‌శ‌లో పిపిపి విధానంలో చేప‌ట్ట‌నున్న మార్కాపురం, మ‌ద‌న‌ప‌ల్లి, ఆదోని, పులివెందుల వైద్య క‌ళాశాల‌ల‌కు గ‌త ప్ర‌భుత్వం మొత్తం 257.50 ఎక‌రాల‌ను కేటాయించ‌గా త‌గు స‌మీక్ష అనంత‌రం వైద్యారోగ్య శాఖ దానిని 197.71 ఎక‌రాల‌కు కుదిస్తూ చేసిన సిఫార‌సును రాష్ట్ర కేబినెట్ ఆమోదించింది. వెర‌సి ఆ 4 కాలేజీల‌కు అద‌నంగా కేటాయించ‌బ‌డిన 59.79 ఎక‌రాలు ప్ర‌భుత్వాధీనంలోకొస్తాయి. ఇందులో ప్ర‌ధానంగా మ‌ద‌న‌ప‌ల్లి కాలేజీ భూములను 97 ఎక‌రాల నుంచి 52.47 ఎక‌రాల‌కు త‌గ్గించ‌డం జ‌రిగింది.
పిపిపి విధానంలో ఆయా ఆసుప‌త్రుల నిర్వ‌హ‌ణ అమ‌ల్లోకి వ‌చ్చిన‌ప్ప‌టి నుండి ఆయా కాలేజీల‌కు సంబంధించిన బోధానాసుప‌త్రుల్లో ప్ర‌స్తుతం ప‌నిచేస్తున్న వైద్య మ‌రియు ఇత‌ర సిబ్బంది జీతాల‌ను రెండేళ్ల పాటు ప్ర‌భుత్వ‌మే భ‌రిస్తుందని కేబినెట్ స‌మావేశంలో నిర్ణ‌యించారు. పిపిపి భాగ‌స్వాములు సొంత ఆసుప‌త్రుల‌ను పూర్తి స్థాయిలో అమ‌లు చేయ‌డానికి ప‌ట్టే స‌మ‌యాన్ని దృష్టిలో ఉంచుకుని కేబినెట్ ఈ నిర్ణ‌యాన్ని తీసుకున్న‌ట్లు అధికారులు తెలిపారు. పిపిపి విధానం కింద కొత్త ఆసుప‌త్రుల నిర్మాణం పూర్త‌యిన త‌ర్వాత ప్ర‌స్తుతం న‌డుస్తున్న బోధ‌నాసుప‌త్రులు తిరిగి ప్ర‌భుత్వ ప‌రిధిలోకొస్తాయి.
ప్ర‌భుత్వం పేరిటే పిపిపి క‌ళాశాల‌లు
పిపిపి విధానంలో అభివృద్ధి చేయ‌బ‌డుతున్న క‌ళాశాల‌ల‌కు ' ప్ర‌భుత్వ వైద్య క‌ళాశాల మ‌రియు ఆసుప‌త్రి
అని నామ‌క‌ర‌ణం చేయాల‌ని రాష్ట్ర కేబినెట్ నిర్ణ‌యించింది. ఈ పేరుతో పాటు క‌ళాశాల ఉండే ప్ర‌దేశం పేరును జోడించాలి. ఉదాహ‌ర‌ణ‌కు...ప్ర‌భుత్వ వైద్య క‌ళాశాల మ‌రియు ఆసుప‌త్రి, మార్కాపురం. దీని కింద పిపిపి భాగ‌స్వామి పేరును కూడా ప్ర‌స్తావించ‌వ‌చ్చు. ఈ రెండు పేర్ల‌ను 70:30 నిష్ప‌త్తిలో ప్ర‌ద‌ర్శించాలి.
భ‌విష్య‌త్తు అభివృద్ధి కార్యక్ర‌మంలో భాగంగా పెరిగే అన్ని రకాల ప‌డ‌క‌ల్లోను 70 శాతం న‌గ‌దు ర‌హిత సేవ‌లు పొందే వారికి కేటాయించాల‌ని కేబినెట్ నిర్దేశించింది.
నియంత్ర‌ణ ప‌రిధిలోకి ప్రైవేట్ ఆయుష్ ఆసుప‌త్రులు
ఆయుష్ సేవ‌ల‌కు విస్తృత ప్రాచుర్యం ల‌భిస్తున్న త‌రుణంలో త‌గు అర్హ‌త‌లు లేని న‌కిలీ వైద్యులు ఆసుప‌త్రుల్ని న‌డ‌ప‌డాన్ని నియంత్రించే ల‌క్ష్యంగా ప్రైవేట్ ఆయుష్ ఆసుప‌త్రుల నిర్వ‌హ‌ణ‌ను నియంత్రించాల‌ని రాష్ట్ర కేబినెట్ నిర్ణ‌యం తీసుకుంది. ఈ మేర‌కు ప్రైవేట్ ఆయుష్ ఆసుప‌త్రుల్ని క్లినిక‌ల్ ఎస్టాబ్లిష్‌మెంట్స్‌(రిజిస్ట్రేష‌న్ అండ్ రెగ్యులేషన్) యాక్ట్,2010 ప‌రిధిలోకి తెచ్చేందుకు కేబినెట్ నిర్ణ‌యించింది. ఇప్ప‌టివ‌ర‌కు ప్రైవేట్ అల్లోప‌తిక్ ఆసుప‌త్రుల్ని మాత్ర‌మే ఈ చ‌ట్టం కింద నియంత్రిస్తున్నారు. త‌గు చ‌ట్ట స‌వ‌ర‌ణ ద్వారా ప్రైవేట్ ఆయుష్ ఆసుప‌త్రుల్ని కూడా త‌గు విధంగా నియంత్రించేందుకు కేబినెట్ నిర్ణ‌యించింది.
త‌ద్వారా ఆయుర్వేద, యోగ, యునాని, సిద్ధ మ‌రియు హోమియోప‌తి ప్రైవేట్ ఆసుప‌త్రులు త‌గు రిజిస్ట్రేష‌న్ పొంది నియంత్ర‌ణ ప‌రిధిలోకి రావాల్సి ఉంటుంది. ఈ చ‌ర్య‌ద్వారా ఈ ఆసుప‌త్రుల్లో క‌నీస ప్ర‌మాణాల మేర‌కు సిబ్బంది నియామ‌కం, సేవ‌ల నాణ్య‌త‌ను పాటించాల్సి ఉంటుంది. దీనివ‌ల‌న అన‌ర్హులకు అడ్డుక‌ట్ట వేస్తూ నాణ్య‌మైన సేవ‌ల్ని అందించేందుకు వీలు క‌లుగుతుంది. రిజిస్ట్రేష‌న్ మ‌రియు రెగ్యులేషన్ ద్వారా ఆయుష్ సేవ‌ల్ని ఆశించే వారిలో న‌మ్మ‌కం పెరుగుతుంది. నియ‌మాల మేర‌కు ప్రామాణిక‌మైన చికిత్సా విధానాలు, రికార్డుల నిర్వ‌హ‌ణ పాటించాల్సి ఉంటుంది. నియ‌మ నిబంధ‌ల‌న మేర‌కు ఆయుష్ సేవ‌ల‌ను అందించాల్సి ఉండ‌డంతో ఈ సేవ‌ల‌కు మ‌రింత విస్తృత‌మైన ఆద‌ర‌ణ ల‌భించే అవ‌కాశ‌మేర్ప‌డుతుంది. బాధ్య‌తాయుతంగా ప్రైవేట్ ఆయుష్ ఆసుప‌త్రుల్ని నిర్వ‌హించే దిశ‌గా ఈ చ‌ట్ట స‌వ‌ర‌ణ ఎంత‌గానో తోడ్ప‌డుతుంది.