అమరావతి అన్ స్టాపబుల్
అమరావతి అన్ స్టాపబుల్
- బ్యాంకుల ప్రధాన కార్యాలయాలతో ఆర్ధిక కేంద్రంగా అమరావతి
- పూర్వోదయ స్కీంతో రాష్ట్రానికి చేయూతనివ్వండి
- పోలవరం-నల్లమల సాగర్ ప్రాజెక్టుకు సాయం అందించండి.
- కేంద్ర సహకారంతో... దేశ ప్రగతికి బ్యాక్ బోన్ గా ఏపీ
- అమరావతి రైతులకు క్యాపిటల్ గెయిన్స్ గడువు పొడిగించండి
- జాతీయ బ్యాంకులు, బీమా సంస్థల ప్రధాన కార్యాలయాల శంకుస్థాపన కార్యక్రమంలో సీఎం చంద్రబాబు
- రాజధానిలో అంతర్జాతీయ ప్రమాణాలతో కాస్మోస్ ప్లానెటోరియం నిర్మాణానికి ఎంఓయూ
అమరావతి, నవంబర్ 28: రైతుల త్యాగం... కేంద్ర ప్రభుత్వ సహకారం, పక్కా ప్రణాళికతో అమరావతి ఆన్ స్టాపబుల్ గా అభివృద్ధి సాధిస్తుందని ముఖ్యమంత్రి చంద్రబాబు నాయుడు వ్యాఖ్యానించారు. గత పాలకుల విధ్వంసం తర్వాత వెంటిలేటర్ మీదున్న రాష్ట్రాన్ని బయటకు తీసుకురావడానికి కేంద్రం పూర్తి స్థాయిలో సహకారం అందించిందని సీఎం అన్నారు. రాజధానిలో ప్రభుత్వ రంగ బ్యాంకులు, బీమా కంపెనీల ప్రధాన కార్యాలయాల నిర్మాణానికి కేంద్ర మంత్రి నిర్మలా సీతారామన్ తో కలిసి ముఖ్యమంత్రి చంద్రబాబు శంకుస్థాపన చేశారు. రాజధానిలో అంతర్జాతీయ ప్రమాణాలతో ప్లానెటోరియం నిర్మాణానికి కేంద్ర మంత్రి నిర్మలా సీతారామన్, చంద్రబాబు సమక్షంలో ఇండియన్ ఇనిస్టిట్యూట్ ఆఫ్ ఆస్ట్రో ఫిజిక్స్ సంస్థ-సీఆర్డీఏలు ఎంఓయూ కుదుర్చుకున్నాయి. ఈ సందర్భంగా ముఖ్యమంత్రి చంద్రబాబు మాట్లాడుతూ...”ప్రధాని మంత్రి చేతుల మీదుగా అమరావతి పునర్నిర్మాణ పనుల్ని ప్రారంభించాం. ప్రస్తుతం రాజధాని నిర్మాణ పనులు స్పీడ్ అందుకున్నాయి. పనులు ఈ స్థాయిలో జరుగుతున్నాయంటే దానికి కారణం కేంద్ర నిర్మలా సీతారామన్. 2014-19 మధ్య పనులు స్పీడప్ చేసే సమయంలో ప్రభుత్వం మారింది. ఆ తర్వాత ఐదేళ్ల పాటు విధ్వంసం జరిగింది. పనులను మళ్లీ రీ-స్టార్ట్ చేశాం. రూ.15 వేల కోట్లను రాజధాని పునర్నిర్మాణానికి కేటాయించారు. నిధులకు ఇబ్బంది లేకుండా సహకరించిన కేంద్ర మంత్రి నిర్మలా సీతారామన్ కు ధన్యవాదాలు. జీఎస్టీ-2.0 సంస్కరణల్ని అమలు చేసిన తీరు అధ్భుతం. జీఎస్టీ సంస్కరణలతో ఆర్ధిక వ్యవస్థ పెరగటంతో పాటు సామాన్యులకూ లబ్ది కలిగింది. ఆశ వదులుకున్న పోలవరాన్ని పునర్ నిర్మాణం చేస్తున్నాం. కొత్త ఢయాఫ్రం వాల్ నిర్మాణానికి రూ.1000 కోట్లు మంజూరు చేసిన కేంద్రానికి ధన్యవాదాలు. ప్రతీ ఇంట్లో మహిళలే ఆర్ధిక మంత్రులు. మన దేశానికి కూడా మహిళే ఆర్ధిక మంత్రిగా ఉన్నారు. దేశ ఆర్ధిక వ్యవస్థను గాడిలో పెట్టడంలో ఆమె అత్యంత కీలకంగా వ్యవహరిస్తున్నారు. దేశాన్ని ప్రధాన మంత్రి అగ్రస్థానానికి తీసుకెళ్లేందుకు ప్రయత్నిస్తుంటే... ఆర్థికమంత్రి కూడా ఆదే స్థాయిలో సహకరిస్తున్నారు. బ్యాంకులన్నింటికీ ఒకేసారి శంకుస్థాపన చేయాలని నిర్మలా సీతారామన్ ఇక్కడకు వచ్చారు. 15 ప్రభుత్వ రంగ బ్యాంకులు బీమా సంస్థలు అమరావతిలో ప్రధాన కార్యలాయాల భవనాల నిర్మాణ పనులకు శంకుస్థాపన చేసుకోవడం సంతోషంగా ఉంది. రూ.1,334 కోట్లతో బ్యాంకులు, బీమా కంపెనీల ప్రధాన కార్యాలయాలు ఏర్పాటు అవుతున్నాయి. బ్యాంకులు, బీమా కంపెనీల ఏర్పాటుతో 6,556 మందికి ఉద్యోగాలు కూడా వస్తాయి. అమరావతి సహా రాష్ట్రాభివృద్ధికి బ్యాంకులు, ఫైనాన్స్ సంస్థలు సహకరించాలని కోరుతున్నాం.”అని సీఎం చెప్పారు.
అమరావతి అభివృద్ధి గని
“అనేక ఇబ్బందుల మధ్య రాష్ట్రం ఏర్పడింది. విభజన జరిగింది, రాజధాని లేదు...నాలెడ్జీ ఎకానమీ హైదరాబాద్ కే పరిమితం అయింది. విభజనతో పాటు.. గత పాలకుల వల్ల ఐదేళ్ల పాటు అమరావతికి జరిగిన విధ్వంసం వల్ల చాలా ఇబ్బందులు వచ్చాయి. ఈ క్రమంలో వెంటిలేటర్ మీదున్న రాష్ట్ర ఆర్ధిక వ్యవస్థను గట్టెక్కించిన ఘనత కేంద్రం... కేంద్ర ఆర్ధిక మంత్రి నిర్మలా సీతారామన్ దే. రాష్ట్రంలో మరింత అభివృద్ధి జరగాలి. కేంద్రం తెస్తున్న ప్రతి సంస్కరణలను అమలు చేస్తూ... ఆ పథకాల ద్వారా అభివృద్ధి జరిగేలా...ప్రజలకు మేలు జరిగేలా చూస్తున్నాం. అమరావతిలో రూ. 56 వేల కోట్ల విలువైన ప్రాజెక్టులు ప్రారంభించాం. సీడ్ యాక్సెస్ రోడ్ పూర్తి కానుంది. అమరావతికి 7 జాతీయ రహదారులు అనుసంధానం చేశాం. అమరావతి ప్రాంతానికి రైల్వే లైన్ రాబోతోంది. భారత దేశం గర్వ పడే విధంగా అమరావతి రూపుదిద్దుకుంటుందనే గ్యారెంటీ ఇస్తున్నాం. గ్రీన్ కవర్, నెట్ జీరో వంటి కొత్త విధానాలను అమరావతికి, రాష్ట్రానికి తెస్తున్నాం. విట్, ఎస్ఆర్ఎం, ఎన్ఐడీ, బిట్స్ పిలానీ వంటి వాటితో పాటు... ప్రపంచంలోని బెస్ట్ యూనివర్శిటీలన్నీ అమరావతికి రానున్నాయి. అలాగే క్వాంటం వ్యాలీ రాబోతోంది. అలాగే ఇప్పుడు అంతర్జాతీయ ప్రమాణాలతో కూడిన ప్లానిటోరియం ఏర్పాటు చేసేలా ఒప్పందం కుదుర్చుకోవడం ఆనందంగా ఉంది. 2047 నాటికి దేశం నెంబర్-1గా నిలుస్తుంది. ఈ ప్రగతిలో ఆంధ్రప్రదేశ్ రాష్ట్రం గణనీయమైన పాత్ర పోషిస్తుంది. రాష్ట్ర నిర్మాణాన్ని జీరోతో మొదలు పెట్టాం. 2027 నాటికి పోలవరం పూర్తి చేస్తాం.. 2028 నాటికి అమరావతికి ఓ రూపు వస్తుంది. విశాఖ హక్కు ఆంధ్రుల హక్కు నినాదంతో ఏర్పాటైన విశాఖ ఉక్కును కేంద్రం నిలబెట్టింది. సెంటిమెంటును కాపాడింది. గూగుల్ డేటా సెంటర్ విశాఖకు రావడానికి ప్రధాని ఆశీస్సులు.. నిర్మలా సీతారామన్ సహకారం ఉంది.”అని ముఖ్యమంత్రి చెప్పారు.
రాష్ట్రాన్ని కరవు రహితంగా చేసేలా ప్రణాళికలు
“గోదావరి-కృష్ణా నదుల అనుసంధానం చేయాల్సి ఉంది. రాష్ట్రాన్ని కరవు రహితంగా ఉండేలా ప్రణాళికలు సిద్దం చేస్తున్నాం. పోలవరం-నల్లమల ప్రాజెక్టును 3 ఏళ్లల్లో పూర్తి చేస్తే రాష్ట్రం మొత్తం సస్యశ్యామలం అవుతుంది. వృధాగా సముద్రంలోకి పోతున్న నీళ్లతో ఈ ప్రాజెక్టుకు ప్రణాళికలు రూపొందించాం. దీనికి కేంద్రం సహకరించాలని కోరుతున్నాం. అలాగే రాయలసీమ డ్రాట్ మిటిగేషన్ ప్రాజెక్టుకు సహకారం అందించాలని కోరుతున్నా. పూర్వోదయ స్కీంకు ప్రణాళికలు సిద్దంగా ఉన్నాయి. ఈ స్కీం అమలుపై ఈ ఏడాదిలో ఓ రూపుకు తెస్తాం. కేంద్ర ప్రభుత్వం ఐదేళ్లు సహకరిస్తే... ఆ తర్వాత దేశ ప్రగతికి బ్యాక్ బోన్ గా మేం నిలుస్తాం.”అని ముఖ్యమంత్రి కోరారు.
అమరావతి రైతుల త్యాగాలను మరువలేం
“అమరావతి రైతుల త్యాగాన్ని మరువలేం. అమరావతి కోసం పోరాటాలు చేశారు. వారిని అభినందిస్తున్నా. రైతులు చాలా ఇబ్బందులు ఎదుర్కొన్నారు. అవస్థలు పడ్డారు. రాజధాని నిర్మాణానికి అమరావతి రైతులు పూర్తిగా సహకరించారు. 29వేల మంది రైతులు 34 వేల ఎకరాల భూమిని ఇచ్చారు. ప్రపంచంలో ల్యాండ్ పూలింగ్ లాంటి అద్భుతమైన విధానం అమలు చేసిన ఏకైక ప్రాంతం అమరావతి. గత ప్రభుత్వ విధానాల కారణంగా రైతులకు రావాల్సిన క్యాపిటల్ గెయిన్స్ అందుకోలేక పోయారు. క్యాపిటల్ గెయిన్స్ గడువును మరి కొంత కాలం పొడిగించాలి. క్యాపిటల్ గెయిన్స్ ప్రయోజనాలను రైతులు పొందేలా చూడాలి. ఈ అంశంపై కేంద్ర ఆర్థిక మంత్రి దృష్టి సారించి సానుకూల నిర్ణయం తీసుకోవాలని కోరుతున్నా. ఇవన్నీ జరిగితే... అమరావతి అన్ స్టాపబుల్.”అని సీఎం చెప్పారు. ఈ కార్యక్రమంలో కేంద్ర మంత్రి పెమ్మసాని, మంత్రులు నారా లోకేష్, నారాయణ, పయ్యావుల, కందుల దుర్గేష్, సత్యకుమార్ యాదవ్, తాడికొండ ఎమ్మెల్యే తెనాలి శ్రావణ్ కుమార్, వివిధ శాఖల ఉన్నతాధికారులు, గుంటూరు జిల్లా కలెక్టర్ సహా రాజధాని రైతులు పెద్ద ఎత్తున పాల్గొన్నారు.
శంకుస్థాపన చేసిన బ్యాంకులు, బీమా కంపెనీల వివరాలివి:
స్టేట్ బ్యాంక్ ఆఫ్ ఇండియా
కెనరాబ్యాంక్
బ్యాంక్ ఆఫ్ బరోడా
ఐడీబీఐ
ఇండియన్ ఓవర్సీస్ బ్యాంక్
ఇండియన్ బ్యాంక్
యూనియన్ బ్యాంక్
సెంట్రల్ బ్యాంక్ ఆఫ్ ఇండియా
పంజాబ్ నేషనల్ బ్యాంక్
బ్యాంక్ ఆఫ్ ఇండియా
ఆంధ్రప్రదేశ్ గ్రామీణ బ్యాంక్
ఆప్కాబ్
నాబార్డ్
ఎల్ఐసీ
న్యూ ఇండియా అస్యూరెన్స్ కంపెనీ లిమిటెడ్