ప్రజలకు మరో భారమా? త్వరలో పెట్రోల్ ధరల పెంపు

త్వరలో పెట్రోల్ డీజిల్ ధరలు పెరిగే అవకాశాలు కనిపిస్తున్నాయి. కేంద్ర బడ్జెట్‌కు ముందుగానే ఇంధనంపై ఎక్సైజ్ సుంకాన్ని పెంచే దిశగా కేంద్ర ప్రభుత్వం ఆలోచన చేస్తోందని సమాచారం. లీటర్‌కు 3 నుంచి 4 రూపాయల వరకు భారాన్ని వినియోగదారులపై మోపే అవకాశం ఉందని ఆర్థిక వర్గాలు అంచనా వేస్తున్నాయి.

అంతర్జాతీయ మార్కెట్‌లో ముడి చమురు ధరలు ప్రస్తుతం పెద్దగా మార్పులు లేకుండా స్థిరంగా ఉన్న నేపథ్యంలో ప్రభుత్వ ఖజానాకు అదనపు ఆదాయం సమకూర్చుకోవాలనే ఉద్దేశంతో ఈ నిర్ణయం తీసుకునే అవకాశముందని విశ్లేషకులు చెబుతున్నారు. బడ్జెట్‌కు ముందు ఈ చర్య అమలులోకి వస్తే ప్రభుత్వానికి ఆదాయం పెరుగుతుందని అంచనా.

ఇంధన ధరలు పెరిగితే రవాణా ఖర్చులు పెరిగే అవకాశం ఉంది. దీని ప్రభావంతో నిత్యావసర వస్తువుల ధరలు కూడా పెరిగే ప్రమాదం ఉందని నిపుణులు హెచ్చరిస్తున్నారు. ఇప్పటికే పెరిగిన జీవన వ్యయంతో ఇబ్బందులు పడుతున్న ప్రజలకు ఇది మరో భారంగా మారుతుందని ఆందోళనలు వ్యక్తమవుతున్నాయి. అయితే దేశ ఆర్థిక పరిస్థితిని సమతుల్యంలో ఉంచేందుకు ఈ నిర్ణయం అవసరమని ప్రభుత్వం భావిస్తున్నట్లు సమాచారం.