ములపేట పోర్టు ఆపరేషన్లకు చేరువ: ఉత్తరాంధ్రకు కొత్త ఆర్థిక ఊపు
ములపేట పోర్టు ఆపరేషన్లకు చేరువ: ఉత్తరాంధ్రకు కొత్త ఆర్థిక ఊపు
- డ్రెడ్జర్ విశ్వతేజ తొలి సారి బెర్త్కు చేరిక
- ముప్పై ఐదు వేలకుపైగా ఉద్యోగాల అంచనా
- దశ–ఒకటిలో నాలుగు బెర్తులు, భారీ సామర్థ్యం
- పరిశ్రమల ఆసక్తితో ప్రాంతీయ అభివృద్ధి వేగం
శ్రీకాకుళం జిల్లా, ఫిబ్రవరి 5 (పీపుల్స్ మోటివేషన్):
ఆంధ్రప్రదేశ్లోని ములపేట పోర్టు నిర్మాణంలో కీలక మైలురాయిని అధిగమించింది. డ్రెడ్జర్ విశ్వతేజ తొలి సారి పోర్టు బెర్త్కు చేరుకోవడంతో, నిర్మాణ పనులు తుదిదశకు చేరినట్టు, త్వరలోనే పోర్టు ఆపరేషన్లకు సిద్ధమవుతున్నట్టు అధికారులు వెల్లడించారు. ఈ ఘటనతో ములపేట పోర్టు చరిత్రాత్మక ఘట్టాన్ని నమోదు చేసింది.
ఈ పోర్టు పూర్తిస్థాయిలో పనిచేయడం ప్రారంభిస్తే ప్రత్యక్షంగా, పరోక్షంగా ముప్పై ఐదు వేలకుపైగా ఉద్యోగాలు సృష్టించే అవకాశం ఉందని అంచనా వేస్తున్నారు. దశ–ఒకటిలో భాగంగా నాలుగు బెర్తులు ఏర్పాటు చేసి, ఏటా రెండు కోట్ల ముప్పై ఐదు లక్షల మెట్రిక్ టన్నుల సరుకు నిర్వహణ సామర్థ్యం కల్పించనున్నారు. యాభై రెండు అడుగుల డ్రాఫ్ట్తో లక్ష ఇరవై వేల డెడ్ వెయిట్ టన్నుల సామర్థ్యం గల భారీ నౌకలు ఇక్కడికి రాకపోకలు సాగించగలవు.
బొగ్గు, ఎరువులు, ఇనుము ధాతువు వంటి భారీ సరుకులను నిర్వహించేందుకు ఈ పోర్టును రూపకల్పన చేశారు. ఇప్పటికే పలు ప్రధాన పరిశ్రమలు ములపేట పోర్టు పరిసర ప్రాంతాల్లో పెట్టుబడులు పెట్టేందుకు ఆసక్తి చూపుతున్నట్టు సమాచారం. దీనితో అనుబంధ పరిశ్రమలు, లాజిస్టిక్స్, రవాణా రంగాలు మరింత అభివృద్ధి చెందనున్నాయి. ములపేట పోర్టు ఉత్తరాంధ్ర ప్రాంతానికి గేమ్ ఛేంజర్గా మారనుందని నిపుణులు అభిప్రాయపడుతున్నారు. వాణిజ్యం, పరిశ్రమలు, ప్రాంతీయ ఆర్థిక వృద్ధికి ఇది బలమైన ఆధారంగా నిలుస్తుందని, శ్రీకాకుళం జిల్లాతో పాటు మొత్తం ఉత్తరాంధ్ర ముఖచిత్రాన్ని మార్చే సామర్థ్యం ఈ ప్రాజెక్టుకు ఉందని అధికారులు పేర్కొన్నారు.