వరి ధాన్యం ధరల స్థిరీకరణ రైతులకు భరోసా

- బస్తాకు గరిష్ఠ ధర నిర్ణయం

- జిల్లాల వారీగా కొనుగోలు కేంద్రాల ఏర్పాటు

- మధ్యవర్తుల అక్రమాలకు అడ్డుకట్ట

విజయవాడ, 19 ఫిబ్రవరి (పీపుల్స్ మోటివేషన్): వరి ధాన్యం ధరల స్థిరీకరణ కోసం ప్రభుత్వం కీలక నిర్ణయాలు తీసుకున్నట్లు మంత్రి నాదెండ్ల మనోహర్ తెలిపారు. అన్నదాత కష్టానికి న్యాయం చేయడమే ప్రభుత్వ ప్రధాన లక్ష్యమని స్పష్టం చేశారు. మార్కెట్‌లో ధరలు పడిపోవడంతో రైతులు నష్టపోకుండా గరిష్ఠంగా 75 కిలోల బస్తాకు రూ.1900 వరకు ధర కల్పించేలా చర్యలు తీసుకున్నట్లు వెల్లడించారు. జిల్లావ్యాప్తంగా కొనుగోలు కేంద్రాలను ఏర్పాటు చేసి రైతులు నేరుగా తమ పంటను విక్రయించుకునేలా సౌకర్యాలు కల్పిస్తున్నామని మంత్రి పేర్కొన్నారు. మధ్యవర్తుల అక్రమాలకు అడ్డుకట్ట వేసేందుకు కఠిన చర్యలు తీసుకుంటున్నామని తెలిపారు. రైతుల పంటకు సరైన మద్దతు ధర లభించేలా పర్యవేక్షణను బలోపేతం చేస్తున్నామని చెప్పారు. రైతుల ఖాతాల్లో నేరుగా చెల్లింపులు జరిగే విధానాన్ని అమలు చేస్తున్నామని, పారదర్శక వ్యవస్థ ద్వారా రైతులకు లాభం చేకూరేలా చూస్తున్నామని వివరించారు. ధరలలో ఏవైనా లోపాలు తలెత్తితే వెంటనే సరిదిద్దే చర్యలు తీసుకుంటామని హామీ ఇచ్చారు. రైతు బలంగా ఉంటేనే రాష్ట్రం బలంగా ఉంటుందని మంత్రి నాదెండ్ల మనోహర్ స్పష్టం చేశారు. అన్నదాత సంతోషమే ప్రభుత్వ లక్ష్యమని, వ్యవసాయ రంగాన్ని మరింత బలోపేతం చేసేందుకు అవసరమైన అన్ని చర్యలు తీసుకుంటామని తెలిపారు.