ప్రజలకు మరింత చేరువైన సేవలు: మంత్రి కందుల దుర్గేష్

- మద్దూరులో నూతన గ్రామ సచివాలయ భవనం ప్రారంభం

- ఎంజీఎన్‌ఆర్‌ఈజీఎస్ నిధులతో నిర్మాణం పూర్తి

- గ్రామ పాలనకు కొత్త ఊపునిచ్చిన సచివాలయం

కొవ్వూరు, ఫిబ్రవరి 7 (పీపుల్స్ మోటివేషన్): కొవ్వూరు నియోజకవర్గం, కొవ్వూరు మండలం మద్దూరు గ్రామంలో ఎంజీఎన్‌ఆర్‌ఈజీఎస్ నిధులు నలభై మూడు లక్షల అరవై వేల రూపాయల వ్యయంతో నిర్మించిన నూతన గ్రామ సచివాలయ భవనాన్ని రాష్ట్ర మంత్రి కందుల దుర్గేష్ ఘనంగా ప్రారంభించారు. ఈ కార్యక్రమంలో కొవ్వూరు నియోజకవర్గ శాసనసభ్యులు ముప్పిడి వెంకటేశ్వరరావు పాల్గొన్నారు.

గ్రామ సచివాలయ భవనం ప్రారంభంతో మద్దూరు గ్రామ ప్రజలకు ప్రభుత్వ సేవలు మరింత సులభంగా అందుబాటులోకి వస్తాయని మంత్రి తెలిపారు. సంక్షేమ పథకాల అమలు, సర్టిఫికెట్ల జారీ, ఇతర పరిపాలనా సేవలు ఒకే చోట అందేలా ఈ భవనం రూపుదిద్దుకుందని పేర్కొన్నారు. గ్రామ పాలనను బలోపేతం చేయడమే లక్ష్యంగా ప్రభుత్వం గ్రామ సచివాలయాల నిర్మాణానికి ప్రాధాన్యం ఇస్తోందని మంత్రి కందుల దుర్గేష్ తెలిపారు. గ్రామ స్థాయిలోనే సమస్యలకు పరిష్కారం లభించేలా ఈ సచివాలయాలు కీలక పాత్ర పోషిస్తాయని అన్నారు.

ఈ కార్యక్రమంలో స్థానిక ప్రజాప్రతినిధులు, అధికారులు, గ్రామస్తులు పెద్ద సంఖ్యలో పాల్గొన్నారు. నూతన భవనం గ్రామ అభివృద్ధికి మరింత తోడ్పడుతుందని వారు అభిప్రాయపడ్డారు.