పదో తరగతి విద్యార్థులకు ఆర్టీసీ ఉచిత ప్రయాణం

- పరీక్షల రోజుల్లో ప్రత్యేక సౌకర్యం

- 6.42 లక్షల మంది విద్యార్థులకు ప్రయోజనం

- హాల్ టికెట్ చూపితే చాలు

అమరావతి, 5 మార్చి (పీపుల్స్ మోటివేషన్): ఆంధ్రప్రదేశ్‌లో పదో తరగతి పబ్లిక్ పరీక్షలకు హాజరయ్యే విద్యార్థులకు ఆర్టీసీ బస్సుల్లో ఉచిత ప్రయాణ సౌకర్యం కల్పించాలని సంస్థ యాజమాన్యం ఆదేశాలు జారీ చేసింది. పరీక్షలకు వెళ్లే విద్యార్థులు ఇబ్బందులు పడకుండా ఉండేందుకు ఈ నిర్ణయం తీసుకున్నట్లు అధికారులు తెలిపారు.

రాష్ట్ర వ్యాప్తంగా సుమారు 6.42 లక్షల మంది విద్యార్థులు 3,415 పరీక్షా కేంద్రాల్లో పరీక్షలు రాయనున్నారు. ఈ నేపథ్యంలో విద్యార్థులు సులభంగా పరీక్ష కేంద్రాలకు చేరుకునేందుకు ఆర్టీసీ ప్రత్యేక ఏర్పాట్లు చేసింది. ఈ నెల 16 నుంచి ఏప్రిల్ 1 వరకు నిర్వహించే పరీక్షల సమయంలో విద్యార్థులు పల్లెవెలుగు, అల్ట్రా పల్లెవెలుగు మరియు సిటీ ఆర్డినరీ బస్సుల్లో ఉచితంగా ప్రయాణించవచ్చు. ఇంటి నుంచి పరీక్ష కేంద్రానికి వెళ్లేందుకు మరియు తిరిగి ఇంటికి చేరుకునేందుకు ఈ సౌకర్యాన్ని వినియోగించుకోవచ్చు. బస్సులో ప్రయాణించే సమయంలో విద్యార్థులు తమ పదో తరగతి హాల్ టికెట్‌ను కండక్టర్‌కు చూపిస్తే సరిపోతుందని అధికారులు తెలిపారు. విద్యార్థులు ఈ సౌకర్యాన్ని ఉపయోగించుకుని సమయానికి పరీక్ష కేంద్రాలకు చేరుకోవాలని సూచించారు.