గోదావరిలో విద్యార్థుల గల్లంతు ఘటనపై జగన్ దిగ్భ్రాంతి

- మృతుల కుటుంబాలకు ప్రగాఢ సానుభూతి

- విషాదకర ఘటనపై తీవ్ర ఆవేదన

- కుటుంబాలకు ధైర్యం కలగాలని ఆకాంక్ష

తాడేపల్లి, మార్చి 20 (పీపుల్స్ మోటివేషన్): భద్రాద్రి కొత్తగూడెం జిల్లా భద్రాచలం సరిహద్దు ప్రాంతం కూనవరం వద్ద గోదావరిలో స్నానం చేసేందుకు దిగిన విద్యార్థుల్లో ఐదుగురు గల్లంతైన ఘటనపై మాజీ ముఖ్యమంత్రి, వైఎస్సార్సీపీ అధ్యక్షుడు వైయస్ జగన్ తీవ్ర దిగ్భ్రాంతి వ్యక్తం చేశారు. ఈ ఘటన అత్యంత విషాదకరమని పేర్కొంటూ తన ఆవేదనను తెలియజేశారు. ఉన్నత భవిష్యత్తు ఉన్న యువ విద్యార్థులు ఇలాంటి దుర్ఘటనలో ప్రాణాలు కోల్పోవడం చాలా బాధాకరమని జగన్ అన్నారు. ఈ ఘటన తనను తీవ్రంగా కలచివేసిందని తెలిపారు. మృతుల కుటుంబాలకు ప్రగాఢ సానుభూతి తెలియజేస్తూ వారి బాధలో తాను భాగస్వామినని పేర్కొన్నారు. గల్లంతైన విద్యార్థులంతా అమరావతిలోని ఎస్ఆర్ఎం కళాశాలలో ఇంజినీరింగ్ చదువుతున్నారని వెల్లడించారు. విద్య కోసం ప్రయత్నిస్తున్న ఈ యువత ఇలా మృతి చెందడం రాష్ట్రానికి తీరని లోటని అభిప్రాయపడ్డారు.

ఈ దుఃఖాన్ని తట్టుకునే ధైర్యం, మనోబలం మృతుల కుటుంబాలకు కలగాలని దేవుడిని ప్రార్థిస్తున్నట్లు తెలిపారు. ఇలాంటి ఘటనలు మళ్లీ జరగకుండా జాగ్రత్తలు తీసుకోవాలని సూచించారు. ఈ ఘటన రాష్ట్రవ్యాప్తంగా తీవ్ర విషాదాన్ని మిగిల్చింది. విద్యార్థుల మృతి పట్ల పలువురు నాయకులు, ప్రజలు సంతాపం వ్యక్తం చేస్తున్నారు.