కనకదుర్గమ్మ ఆలయంలో మహా కుంభాభిషేకంలో పాల్గొన్న అనిత

• ఇంద్రకీలాద్రిపై ఘనంగా మహా కుంభాభిషేకం
• ప్రత్యేక పూజలు నిర్వహించిన మంత్రి అనిత
• భక్తులతో మాట్లాడి సౌకర్యాలపై వివరాలు తెలుసుకున్న మంత్రి

విజయవాడ, 7 మార్చి (పీపుల్స్ మోటివేషన్): విజయవాడలోని ఇంద్రకీలాద్రిపై కొలువై ఉన్న కనకదుర్గమ్మ ఆలయంలో నిర్వహిస్తున్న మహా కుంభాభిషేక మహోత్సవ వేడుకల్లో మంత్రి వంగలపూడి అనిత పాల్గొన్నారు. అత్యంత వైభవంగా జరుగుతున్న ఈ పుణ్యకార్యంలో ఆమె అమ్మవారిని దర్శించుకుని ప్రత్యేక పూజలు నిర్వహించారు. లోకకళ్యాణం కాంక్షిస్తూ నిర్వహించిన ఈ మహోత్సవంలో పాల్గొనడం తనకు ఆనందంగా ఉందని తెలిపారు. ఈ సందర్భంగా ఆలయ అధికారులు మరియు వేద పండితులు మంత్రి అనితకు పూర్ణకుంభంతో ఘన స్వాగతం పలికారు. అనంతరం వేద మంత్రాల మధ్య ప్రత్యేక పూజా కార్యక్రమాలు నిర్వహించారు. ఆలయంలో జరుగుతున్న మహా కుంభాభిషేక కార్యక్రమాలు ఆధ్యాత్మిక వాతావరణంలో కొనసాగుతున్నట్లు తెలిపారు.

దేవాలయానికి పెద్ద సంఖ్యలో వచ్చిన భక్తులతో మంత్రి అనిత స్వయంగా మాట్లాడారు. వారికి అందిస్తున్న సౌకర్యాలు, ఏర్పాట్లపై వివరాలు అడిగి తెలుసుకున్నారు. భక్తులకు ఎలాంటి ఇబ్బందులు లేకుండా అన్ని ఏర్పాట్లు చేయాలని ఆలయ అధికారులకు సూచించారు. అమ్మవారి కృపాకటాక్షాలతో రాష్ట్ర ప్రజలందరూ సుఖసంతోషాలతో ఉండాలని మంత్రి అనిత ప్రార్థించారు. ఈ సందర్భంగా భక్తులు పెద్ద సంఖ్యలో పాల్గొని ప్రత్యేక పూజలు నిర్వహించారు. మహా కుంభాభిషేక మహోత్సవం సందర్భంగా ఆలయం ఆధ్యాత్మిక శోభతో కళకళలాడుతోంది.