నెల్లూరు నగరంలో అభివృద్ధి పనులకు శ్రీకారం:

- మంత్రి పొంగూరు నారాయణ

- రోడ్ల పనుల పరిశీలన – నాణ్యతపై ప్రత్యేక దృష్టి

- నీటి సరఫరా కోసం ఎన్‌టీఆర్ సుజల ప్లాంట్ ప్రారంభం

- కాలనీల్లో పర్యటన – ప్రజల సమస్యలపై స్పందన

నెల్లూరు, మార్చి 31 (పీపుల్స్ మోటివేషన్): నెల్లూరు నగరంలోని పలు ప్రాంతాల్లో రాష్ట్ర మంత్రి పొంగూరు నారాయణ విస్తృతంగా పర్యటించి అభివృద్ధి కార్యక్రమాలకు శ్రీకారం చుట్టారు. నగరాభివృద్ధి లక్ష్యంగా పలు ప్రాజెక్టులను ప్రారంభిస్తూ, ప్రగతిపై అధికారులతో సమీక్ష నిర్వహించారు. ఈ సందర్భంగా పోర్లుకట్ట ప్రాంతంలో రూ.1.20 కోట్లతో నిర్మిస్తున్న సీసీ రోడ్డు పనులను మంత్రి స్వయంగా పరిశీలించారు. పనుల నాణ్యతపై ఎలాంటి రాజీ లేకుండా కచ్చితంగా ప్రమాణాలు పాటించాలని అధికారులకు ఆదేశించారు. నిర్దేశిత గడువు అయిన ఒక నెలలో పనులు పూర్తి చేయాలని సూచించారు. అదే విధంగా ఆత్మకూరు బస్ స్టాండ్ సమీపంలో రూ.28 లక్షల వ్యయంతో చేపట్టనున్న సీసీ రోడ్డు పనులకు మంత్రి శంకుస్థాపన చేశారు. ఈ రహదారి నిర్మాణంతో స్థానిక ప్రజలకు రవాణా సౌకర్యం మెరుగుపడుతుందని తెలిపారు.

జేమ్స్ గార్డెన్ ప్రాంతంలో ఎన్‌టీఆర్ సుజల నీటి శుద్ధి కేంద్రాన్ని మంత్రి ప్రారంభించారు. ఈ ప్లాంట్ ద్వారా ప్రజలకు శుద్ధమైన తాగునీరు అందుబాటులోకి వస్తుందని చెప్పారు. ఆరోగ్య పరిరక్షణలో భాగంగా ఈ ప్రాజెక్టు కీలక పాత్ర పోషిస్తుందని పేర్కొన్నారు.

వెంకటేశ్వరపురం మరియు గాంధీ గిరిజన కాలనీలలోని పాఠశాలలను సందర్శించిన మంత్రి, విద్యార్థులతో మాట్లాడి వారి సమస్యలను తెలుసుకున్నారు. స్థానిక నివాసితులతో కూడా చర్చించి సమస్యలను వెంటనే పరిష్కరించాలని సంబంధిత అధికారులకు ఆదేశించారు. ప్రజల అవసరాలను దృష్టిలో పెట్టుకొని అభివృద్ధి కార్యక్రమాలను వేగవంతం చేస్తున్నామని మంత్రి తెలిపారు. నెల్లూరు నగరాన్ని అన్ని రంగాల్లో అభివృద్ధి దిశగా తీసుకెళ్లేందుకు ప్రభుత్వం కట్టుబడి ఉందని ఆయన స్పష్టం చేశారు.