ధర్మపురిలో గోదావరి తీరం, ప్రభుత్వ ఆసుపత్రి పరిశీలన

- సానిటేషన్ పరిస్థితులపై కలెక్టర్ సమీక్ష

- ఆసుపత్రి సేవలు, సిబ్బంది హాజరుపై వివరాలు సేకరణ

- రోగులకు మెరుగైన వైద్య సేవలు అందించాలని ఆదేశాలు

జగిత్యాల, 9 మార్చి (పీపుల్స్ మోటివేషన్):

జగిత్యాల జిల్లా ధర్మపురిలో గోదావరి నది తీరం వద్ద సానిటేషన్ పరిస్థితులను జిల్లా కలెక్టర్ బి సత్య ప్రసాద్ పరిశీలించారు. నది పరిసర ప్రాంతాల్లో పరిశుభ్రతను కాపాడేందుకు తీసుకుంటున్న చర్యలను ఆయన సమీక్షించారు. ప్రజలకు ఎలాంటి అసౌకర్యం కలగకుండా పరిశుభ్రతపై ప్రత్యేక దృష్టి పెట్టాలని అధికారులకు సూచించారు. అనంతరం ధర్మపురి ప్రభుత్వ ఆసుపత్రిని కలెక్టర్ సందర్శించారు. ఆసుపత్రిలో ఉన్న పరిశుభ్రత పరిస్థితులను పరిశీలించి వైద్య సేవలపై సమగ్రంగా సమాచారం తీసుకున్నారు. ఆసుపత్రిలో సిబ్బంది హాజరు, ప్రయోగశాల సేవలు, వైద్య సేవల అందుబాటు, బయటి రోగుల విభాగంలో చికిత్స పొందుతున్న వారి వివరాలను అడిగి తెలుసుకున్నారు. రోగులకు సమయానికి మెరుగైన వైద్య సేవలు అందేలా చర్యలు తీసుకోవాలని కలెక్టర్ అధికారులను ఆదేశించారు. ఆసుపత్రిలో పరిశుభ్రతను కచ్చితంగా పాటిస్తూ రోగులకు సౌకర్యవంతమైన వాతావరణం కల్పించాలని సూచించారు. ఈ కార్యక్రమంలో జగిత్యాల ఆర్‌డీవో మధుసూదన్, మున్సిపల్ కమిషనర్, తహసీల్దార్ మరియు సంబంధిత అధికారులు పాల్గొన్నారు.