స్థిరంగా బంగారం ధరలు

హైదరాబాద్, మార్చి 15 (పీపుల్స్ మోటివేషన్):

 దేశవ్యాప్తంగా నేడు బంగారం ధరలు స్థిరంగా కొనసాగుతున్నాయి. నిన్న భారీగా తగ్గిన తర్వాత ఈరోజు మార్కెట్‌లో పెద్దగా మార్పులు కనిపించలేదు. యుద్ధ ప్రభావంతో బంగారం ధరలు పెరుగుతాయని భావించినప్పటికీ ప్రస్తుతం ధరలు తగ్గిన స్థాయిలోనే కొనసాగడం మార్కెట్ వర్గాలను ఆశ్చర్యానికి గురిచేస్తోంది.

గత వారం రోజులుగా పసిడి ధరలు వరుసగా తగ్గుతూ వస్తున్నాయి. మార్చి నెల ప్రారంభంలో నమోదైన గరిష్ట ధరలతో పోలిస్తే ప్రస్తుతం తులం బంగారంపై సుమారు ₹7,000 నుంచి ₹8,000 వరకు తగ్గుదల కనిపిస్తోంది. అమెరికా డాలర్ బలపడడం, అంతర్జాతీయ మార్కెట్లలో బాండ్ దిగుబడులు పెరగడం వల్ల పెట్టుబడిదారులు బంగారం కంటే ఇతర పెట్టుబడుల వైపు మొగ్గు చూపుతున్నారని నిపుణులు చెబుతున్నారు.

దేశంలోని ప్రధాన నగరాల్లో పది గ్రాముల బంగారం ధరలు ఇలా ఉన్నాయి. హైదరాబాద్, విజయవాడ, ముంబై, బెంగళూరు నగరాల్లో 22 క్యారెట్ల బంగారం ధర ₹1,46,350 కాగా 24 క్యారెట్ల బంగారం ధర ₹1,59,660గా ఉంది. ఢిల్లీలో 22 క్యారెట్ల బంగారం ₹1,46,500, 24 క్యారెట్ల బంగారం ₹1,59,810గా నమోదైంది. చెన్నైలో 22 క్యారెట్ల బంగారం ₹1,47,600 కాగా 24 క్యారెట్ల బంగారం ₹1,61,020గా ఉంది.

బంగారంతో పాటు వెండి ధర కూడా అదే ధోరణిలో కొనసాగుతోంది. ప్రస్తుతం దేశవ్యాప్తంగా కిలో వెండి ధర సుమారు ₹2,80,000 వద్ద ఉంది. నిన్న ఒక్కరోజే వెండి ధర కిలోకు దాదాపు ₹10,000 వరకు తగ్గడం గమనార్హం. మార్కెట్ పరిస్థితులను బట్టి రాబోయే రోజుల్లో ధరల్లో మార్పులు చోటు చేసుకునే అవకాశం ఉందని వ్యాపారులు చెబుతున్నారు.