ఇరాన్ క్షిపణి దాడిలో భారతీయుడు గాయపాటు

- ఇజ్రాయెల్‌లో ఘటన, మెడకు తీవ్ర గాయం

- టెల్ అవీవ్ ఆసుపత్రిలో చికిత్స

- బాధితుడిని పరామర్శించిన భారత రాయబార కార్యాలయ అధికారులు

టెల్ అవీవ్, 9 మార్చి (పీపుల్స్ మోటివేషన్):

ఇరాన్ క్షిపణి దాడి కారణంగా ఇజ్రాయెల్‌లో ఒక భారత పౌరుడు గాయపడ్డాడు. క్షిపణి నుంచి వచ్చిన శకలాలు తగలడంతో అతడి మెడకు తీవ్ర గాయమైనట్లు ఇజ్రాయెల్ అధికారులు తెలిపారు. ఆదివారం ఈ ఘటన జరగగా వెంటనే అతడిని టెల్ అవీవ్‌లోని ఆసుపత్రికి తరలించారు. ఆసుపత్రిలో అతడికి శస్త్రచికిత్స నిర్వహించినట్లు వైద్యులు తెలిపారు. ప్రస్తుతం బాధితుడి ఆరోగ్య పరిస్థితి స్థిరంగా ఉన్నట్లు అధికారులు వెల్లడించారు. అయితే గాయపడిన భారతీయుడి పూర్తి వివరాలు ఇంకా వెల్లడించలేదు. ఈ ఘటనపై సమాచారం అందుకున్న టెల్ అవీవ్‌లోని భారత రాయబార కార్యాలయ అధికారులు ఆసుపత్రికి వెళ్లి బాధితుడిని పరామర్శించారు. అతడి ఆరోగ్య పరిస్థితిని ఎప్పటికప్పుడు సమీక్షిస్తున్నామని వారు తెలిపారు. పశ్చిమాసియాలో కొనసాగుతున్న ఉద్రిక్త పరిస్థితుల నేపథ్యంలో ఇజ్రాయెల్‌లో ఉన్న భారతీయులతో నిరంతరం సంప్రదింపులు కొనసాగిస్తున్నట్లు భారత రాయబార కార్యాలయం వెల్లడించింది. అవసరమైన సాయం అందించేందుకు తగిన చర్యలు తీసుకుంటున్నామని అధికారులు తెలిపారు.