అమరావతి బిల్లుపై వైవీ సుబ్బారెడ్డి ప్రశ్నలు

• 2 లక్షల కోట్లు ఎక్కడి నుండి వస్తాయి?
• రాజధానిపై కేంద్రం అఫిడవిట్‌కు, ప్రస్తుత బిల్లుకు పొంతన లేదని విమర్శ
• 50 వేల ఎకరాల సేకరణ జరిగినా శాశ్వత నిర్మాణాలు లేవని ఆవేదన
• భారీ వ్యయంతో కూడిన ప్రాజెక్టు ఆర్థిక సాధ్యాసాధ్యాలపై రాజ్యసభలో నిలదీత

న్యూఢిల్లీ, ఏప్రిల్ 2 (పీపుల్స్ మోటివేషన్):పార్లమెంటులో ప్రవేశపెట్టిన 'ఆంధ్రప్రదేశ్ పునర్వ్యవస్థీకరణ (సవరణ) బిల్లు 2026'పై వైఎస్సార్ కాంగ్రెస్ పార్టీ ఎంపీ వైవీ సుబ్బారెడ్డి రాజ్యసభలో తీవ్ర అభ్యంతరం వ్యక్తం చేశారు. రాజధాని ఎంపిక అనేది రాష్ట్ర ప్రభుత్వ పరిధిలోని అంశమని గతంలో కేంద్ర ప్రభుత్వం స్వయంగా కోర్టులో అఫిడవిట్ దాఖలు చేసిందని ఆయన గుర్తు చేశారు. అలాంటప్పుడు ఇప్పుడు కేంద్రమే నేరుగా అమరావతిని రాజధానిగా ప్రకటిస్తూ బిల్లును ఎలా తీసుకువస్తుందని ఆయన ప్రశ్నించారు. ఈ బిల్లులో అనేక అంశాలపై స్పష్టత లేదని, రాజ్యాంగంలో రాజధానిని నిర్ణయించే అధికారం కేంద్రానికి ఎక్కడుందని ఆయన నిలదీశారు. ఈ సందర్భంగా బిల్లును వ్యతిరేకిస్తూ వైఎస్సార్‌సీపీ ఎంపీలు రాజ్యసభ నుండి వాకౌట్ చేశారు.అమరావతి కోసం గతంలో దాదాపు 50 వేల ఎకరాల భూమిని సేకరించినప్పటికీ, ఇప్పటి వరకు అక్కడ ఒక్కటంటే ఒక్క శాశ్వత నిర్మాణం కూడా జరగలేదని వైవీ సుబ్బారెడ్డి విమర్శించారు. రాజధాని అభివృద్ధి కోసం ఎకరాకు రూ. 2 కోట్లు ఖర్చవుతుందని ప్రభుత్వం చెబుతోందని, ఆ లెక్కన 50 వేల ఎకరాలకు కేవలం మౌలిక సదుపాయాల కోసమే రూ. 1 లక్ష కోట్లు అవసరమవుతాయని వివరించారు. మొత్తం ప్రాజెక్టు వ్యయం రూ. 2 లక్షల కోట్లకు పైగా ఉంటుందని అంచనా వేస్తున్నారని, అసలే అప్పుల్లో ఉన్న రాష్ట్రానికి అంత భారీ నిధులు ఎక్కడి నుండి వస్తాయని ఆయన ప్రశ్నించారు. ఆర్థిక సాధ్యాసాధ్యాలను పరిగణనలోకి తీసుకోకుండా ఇలాంటి నిర్ణయాలు తీసుకోవడం సరైంది కాదన్నారు.రాష్ట్ర అప్పులు ఇప్పటికే ఆందోళనకర స్థాయిలో ఉన్నాయని, ఇదే పరిస్థితి కొనసాగితే భవిష్యత్తులో ఆర్థిక సంక్షోభం తలెత్తే ప్రమాదం ఉందని వైవీ సుబ్బారెడ్డి హెచ్చరించారు. అమరావతి పేరుతో గతంలో జరిగిన అవినీతిని మరియు ప్రస్తుత వ్యయ ప్రణాళికలను ఆయన కుంభకోణంగా అభివర్ణించారు. రాజధాని రైతులకు ప్లాట్లు ఎప్పుడు ఇస్తారో, అభివృద్ధి ఎప్పటికి పూర్తవుతుందో బిల్లులో ఎక్కడా స్పష్టత లేదని మండిపడ్డారు. ఏపీకి అత్యంత కీలకమైన 'ప్రత్యేక హోదా' అంశాన్ని ఈ సవరణ బిల్లులో ఎందుకు చేర్చలేదని ఆయన కేంద్రాన్ని నిలదీశారు. ప్రత్యేక హోదా సాధన కోసం తమ పార్టీ పోరాటం కొనసాగిస్తుందని స్పష్టం చేశారు.అమరావతిని తాము ఎప్పుడూ వ్యతిరేకించలేదని, అయితే రాష్ట్రం మొత్తం అభివృద్ధి చెందాలన్నదే తమ ఉద్దేశమని వైవీ సుబ్బారెడ్డి వివరించారు. రాజధాని నిర్మాణం పేరుతో కేవలం ఒక ప్రాంతంపైనే లక్షల కోట్లు ఖర్చు చేయడం వల్ల ఇతర ప్రాంతాలు వెనుకబడిపోతాయని ఆందోళన వ్యక్తం చేశారు. కేంద్రం ప్రవేశపెట్టిన ఈ బిల్లు కేవలం రాజకీయ ప్రయోజనాల కోసమే తప్ప, రాష్ట్ర ప్రయోజనాల కోసం కాదని విమర్శించారు. నిధుల లభ్యతపై స్పష్టమైన హామీ లేకుండా ఇంత పెద్ద ప్రాజెక్టును చేపట్టడం ప్రజలను మోసం చేయడమేనని ఆయన తన ప్రసంగంలో పేర్కొన్నారు.