పాఠశాల మధ్యాహ్న భోజన పథకంలో పురుగుల మందు నిందితుడి అరెస్ట్
పాఠశాల మధ్యాహ్న భోజన పథకంలో పురుగుల మందు నిందితుడి అరెస్ట్
మధ్యాహ్న భోజన పాత్రలపై పురుగుల మందు చల్లిన యువకుడు..
కుటుంబం పట్టించుకోవట్లేదనే కోపంతో ఘాతుకం..
ప్రిన్సిపాల్ అప్రమత్తతతో బయటపడ్డ దుశ్చర్య..
నిందితుడి అరెస్ట్..
ఆదిలాబాద్ జిల్లా ధర్మపురి ప్రాథమిక పాఠశాలలో ఘటన..
వివరాల్లోకి వెళితే.. ధర్మపురి గ్రామానికి చెందిన సోయం కిస్టు (27) అనే గిరిజన యువకుడు నిరుద్యోగి. తన కుటుంబ సభ్యులు తనను పట్టించుకోవడం లేదని, ఏ పనిలోనూ తనకు సహకరించడం లేదని కొంతకాలంగా అతను అసంతృప్తితో ఉన్నాడు. ఈ క్రమంలో వారి దృష్టిని ఆకర్షించేందుకు ఏదైనా సంచలనాత్మకమైన పని చేయాలని నిర్ణయించుకున్నాడు. ఇందులో భాగంగానే మంగళవారం నాడు పాఠశాల వంటగదిలోకి చొరబడ్డాడు.
పాఠశాల ప్రిన్సిపాల్ ప్రతిభ తెలిపిన వివరాల ప్రకారం.. మంగళవారం ఉదయం వంటగది తలుపు గడియ విరిగి ఉండటం, గదిలో ఘాటైన వాసన రావడాన్ని ఆమె గమనించారు. లోపలికి వెళ్లి చూడగా, మధ్యాహ్న భోజనం వండేందుకు సిద్ధంగా ఉంచిన పాత్రలపై ఏదో రసాయనం చల్లి ఉంది. పక్కనే బకెట్‌లో ఉన్న నీటిలో కూడా రసాయనం కలిపి ఉంది. దీంతో అనుమానం వచ్చిన ఆమె వెంటనే వంట మనిషి చంద్రకళకు సమాచారం అందించారు. విద్యార్థులను, తనను చంపే ఉద్దేశంతోనే ఎవరో గుర్తు తెలియని వ్యక్తులు పాత్రలపై, నీటిలో విషం కలిపారని, వారిపై చట్టపరమైన చర్యలు తీసుకోవాలని పోలీసులకు ఫిర్యాదు చేశారు.
ఫిర్యాదు అందుకున్న పోలీసులు వెంటనే రంగంలోకి దిగారు. ఆదిలాబాద్ ఎస్పీ అఖిల్ మహాజన్ పర్యవేక్షణలో పాఠశాల ప్రాంగణాన్ని క్షుణ్ణంగా తనిఖీ చేయగా, ఖాళీ పురుగుల మందు డబ్బా లభ్యమైంది. "మా బృందం ముగ్గురు అనుమానితులను అదుపులోకి తీసుకుని విచారించగా, వారిలో ఒకడైన సోయం కిస్టు నేరం అంగీకరించాడు. అతను పాఠశాల సమీపంలోనే నివసించే నిరుద్యోగ కూలీ. బుధవారం అతన్ని అరెస్ట్ చేసి జ్యుడీషియల్ కస్టడీకి తరలించాం" అని ఎస్పీ తెలిపారు.
పోలీసుల విచారణలో కిస్టు తన నేరాన్ని ఒప్పుకున్నాడు. తన కుటుంబ సభ్యులు తనను పట్టించుకోకపోవడంతో, వారి దృష్టిని ఆకర్షించడానికే ఈ పని చేసినట్లు తెలిపాడు. "తన సోదరుడు పత్తి చేను కోసం తెచ్చిన పురుగుల మందునే ఇందుకు ఉపయోగించినట్లు కిస్టు చెప్పాడు. పాత్రలపై మందు చల్లి, బకెట్‌లోని నీటిలో కలిపాడు. అయితే, ఓవర్ హెడ్ ట్యాంకులో మాత్రం కలపలేదు" అని ఇచ్చోడ సీఐ భీమేష్ వివరించారు.
ప్రిన్సిపాల్ ప్రతిభ ఫిర్యాదు మేరకు పోలీసులు భారతీయ న్యాయ సంహిత (BNS) సెక్షన్లు 329(4), 324(6), 331(8), 332 లతో పాటు FSSA చట్టంలోని సెక్షన్ 56 కింద కేసు నమోదు చేసి దర్యాప్తు చేస్తున్నారు. ప్రిన్సిపాల్ సకాలంలో స్పందించడంతో పెను ప్రమాదం తప్పిందని అధికారులు, గ్రామస్థులు ఊపిరి పీల్చుకున్నారు. నిందితుడు ప్రస్తుతం జ్యుడీషియల్ కస్టడీలో ఉన్నాడు.