ఓడినా గర్వంగా ఉంది.. రిటైర్మెంట్ మాత్రం బాధగా ఉంది – లారా వోల్వార్ట్
ఓడినా గర్వంగా ఉంది.. రిటైర్మెంట్ మాత్రం బాధగా ఉంది – లారా వోల్వార్ట్
-ఫైనల్‌లో భారత జట్టు చాలా బాగా ఆడింది
-ఈ ఓటమి మాకు ఒక మంచి పాఠాన్ని నేర్పింది
-మారిజానే కాప్ రిటైర్మెంట్ జట్టుకు తీరని లోటు -వోల్వార్ట్
ముంబై, నవంబర్‌ 3 (పీపుల్స్ మోటివేషన్)
ద‌క్షిణాఫ్రికా మహిళా జట్టు కెప్టెన్‌ లారా వోల్వార్ట్ వన్డే ప్రపంచకప్ 2025 ఫైనల్‌లో భారత్‌ చేతిలో ఓటమిపై స్పందించింది. తన జట్టు ప్ర‌ద‌ర్శ‌న‌పై గర్వంగా ఉన్నా, ఈ ఓటమి త‌మ‌కు ఒక పెద్ద పాఠమ‌ని ఆమె పేర్కొంది. వ్యక్తిగ‌తంగా అద్భుత‌మైన బ్యాటింగ్‌తో సెంచరీ సాధించి ఆక‌ట్టుకున్న వోల్వార్ట్, సీనియర్‌ ఆటగాడు మారిజానే కాప్ రిటైర్మెంట్‌పై కూడా స్పందించింది. ఈ టోర్నమెంట్‌ తమ జట్టుకు ఎన్నో అనుభ‌వాల‌ను, పాఠాల‌ను ఇచ్చింద‌ని ఆమె చెప్పింది.
నవీ ముంబయిలోని డీవై పాటిల్‌ స్టేడియంలో ఆదివారం జ‌రిగిన ఫైనల్‌లో భారత్‌ చేతిలో 52 పరుగుల తేడాతో ఓడినా, జట్టు కృషిపై గర్వంగా ఉందని వోల్వార్ట్ తెలిపింది. “మేము ప్రపంచకప్ గెలవలేకపోయాం కానీ మా జట్టు పోరాటస్ఫూర్తి అసాధారణంగా ఉంది. చివరి వరకు కృషి చేశాం. మా ఆటగాళ్లు తమ శక్తినంతా ఉపయోగించారు. అందుకే ఓడినా గర్వంగా ఉంది,” అని ఆమె పేర్కొంది.
అదే సమయంలో జట్టు సీనియర్‌ ఆటగాడు మారిజానే కాప్ రిటైర్మెంట్‌పై కూడా ఆమె భావోద్వేగంగా స్పందించింది. “మారిజానే మా జట్టు వెన్నెముక. ఆమెతో ఆడటం గర్వంగా ఉంది. ఆమె నుంచి మేము చాలా నేర్చుకున్నాం. ఆమె లేకుండా జట్టును ఊహించుకోవడం కష్టం,” అని వోల్వార్ట్ చెప్పారు.
ఫైనల్‌లో సెంచరీతో మెరిసిన వోల్వార్ట్ మాట్లాడుతూ, “ప్రపంచకప్ ప్రారంభానికి ముందు నా ఫామ్‌ బాగాలేదు. మొదటి రెండు మ్యాచ్‌ల్లో కూడా బాగా ఆడలేకపోయాను. అప్పట్లో చాలా ఆలోచించాను. తర్వాత ఒక విషయం గ్రహించాను — ఇది కేవలం మరో క్రికెట్‌ మ్యాచ్‌ మాత్రమే. కెప్టెన్సీని, బ్యాటింగ్‌ను వేర్వేరుగా తీసుకుంటేనే సహజ ఆట ఆడగలనని తెలుసుకున్నాను. ఆ తర్వాతే నా ఆటలో స్వేచ్ఛ, నమ్మకం తిరిగి వచ్చింది,” అని పేర్కొంది.
తన ప్రదర్శన, జట్టు కృషిపై గర్వంగా ఉందని వోల్వార్ట్ మరలా స్పష్టం చేసింది. “మేము గెలవలేకపోయినా, ఈ ప్రయాణం మాకు ఒక గొప్ప అనుభవం. ఈ ఓటమి మాకు ఒక కొత్త ఆరంభం. రాబోయే సిరీస్‌లలో మరింత బలంగా తిరిగి వస్తాం,” అని ఆమె తెలిపింది.