2026లో రాగి బంగారం అవుతుంది.. 

- కానీ పెట్టుబడి పెట్టడం అంత సులువు కాదు

2025 సంవత్సరంలో రాగి పెట్టుబడిదారులకు అద్భుతమైన లాభాలను అందించింది. గత ఏడాది మొత్తం మీద రాగి ధరలు దాదాపు 60 శాతం వరకు పెరిగినట్లు మార్కెట్ గణాంకాలు చెబుతున్నాయి. 2026 నాటికి రాగి విలువ మరింత పెరిగే అవకాశాలు ఉన్నాయని నిపుణులు అంచనా వేస్తున్నారు. అందుకే ఇప్పుడు పెట్టుబడిదారులు రాగిని కొత్త బంగారంగా చూస్తున్నారు.

విద్యుత్ వాహనాల తయారీ, డేటా కేంద్రాల విస్తరణ, విద్యుత్ కేబుల్స్ అవసరం పెరగడం వంటి కారణాలతో రాగికి డిమాండ్ భారీగా పెరిగింది. మరోవైపు ప్రపంచవ్యాప్తంగా రాగి ఉత్పత్తి ఆశించిన స్థాయిలో లేకపోవడంతో సరఫరా కొరత ఏర్పడుతోంది. అంతర్జాతీయ అంచనాల ప్రకారం 2026 నాటికి ప్రపంచ మార్కెట్లో సుమారు 150000 టన్నుల రాగి లోటు ఏర్పడే అవకాశం ఉంది. ఈ పరిస్థితి రాగి ధరలను మరింత పైకి నెట్టే సూచనలు ఇస్తోంది.

భారతదేశంలో రాగిలో పెట్టుబడి పెట్టడం బంగారం లేదా వెండి లాగే సులభం కాదు. రాగికి సంబంధించి ఎటువంటి పథకాలు లేదా ఫండ్లు ఇప్పటివరకు అందుబాటులోకి రాలేదు. అలాగే సాధారణ ప్రజలు నేరుగా రాగి బిస్కెట్లు లేదా నాణేలు కొనుగోలు చేసే అవకాశం కూడా లేదు. ప్రస్తుతం రిటైల్ పెట్టుబడిదారులకు ఉన్న ప్రధాన మార్గం కమోడిటీ మార్కెట్‌లో జరిగే ఫ్యూచర్స్ ట్రేడింగ్ మాత్రమే.

అయితే ఈ విధానం చిన్న పెట్టుబడిదారులకు ప్రమాదకరమైనదిగా నిపుణులు హెచ్చరిస్తున్నారు. ఒక్క ట్రేడుకు భారీ మొత్తంలో మార్జిన్ డబ్బు అవసరం అవుతుంది. మార్కెట్ లో చిన్న మార్పు వచ్చినా నష్టాలు ఎక్కువగా వచ్చే ప్రమాదం ఉంటుంది. అందుకే రాగిలో పెట్టుబడి పెట్టే ముందు మార్కెట్‌పై లోతైన అవగాహన, రిస్క్ నియంత్రణ పద్ధతులు తప్పనిసరిగా తెలుసుకోవాలని నిపుణులు సూచిస్తున్నారు.

మొత్తంగా చూస్తే రాగి భవిష్యత్తులో భారీ లాభాల అవకాశాలు ఉన్న రంగంగా మారుతోంది. కానీ ఇది ప్రతి పెట్టుబడిదారికి సరిపడే మార్గం కాదని, అనుభవం ఉన్నవారే జాగ్రత్తగా అడుగులు వేయాలని ఆర్థిక నిపుణులు స్పష్టం చేస్తున్నారు.