ప్రైవేట్ ఉద్యోగులకు గుడ్‌న్యూస్.. 

- పీఎఫ్ కటింగ్ వేతన పరిమితి పెంచే అవకాశం

ప్రైవేట్ రంగంలో పనిచేస్తున్న లక్షలాది ఉద్యోగులకు శుభవార్త వినిపిస్తోంది. పీఎఫ్ కటింగ్‌కు వర్తించే వేతన పరిమితిని పెంచే అంశం తుది దశకు చేరుకున్నట్లు తెలుస్తోంది. ప్రస్తుతం అమలులో ఉన్న 15000 రూపాయల వేతన పరిమితి పాతదిగా మారిందని, దీన్ని సవరించాల్సిన అవసరం ఉందని సుప్రీంకోర్టు కీలక వ్యాఖ్యలు చేసింది. ఈ అంశంపై కేంద్ర ప్రభుత్వం మరియు ఈపీఎఫ్‌వో స్పష్టమైన నిర్ణయం తీసుకునేందుకు నాలుగు నెలల గడువు ఇచ్చింది.

పీఎఫ్ నిబంధనల ప్రకారం ప్రస్తుతం నెలవారీ జీతం 15000 రూపాయల వరకు ఉన్న ఉద్యోగులకే తప్పనిసరిగా పీఎఫ్ వర్తిస్తోంది. ఈ పరిమితి కారణంగా దీనికంటే ఎక్కువ వేతనం పొందుతున్న అనేక మంది ఉద్యోగులు పీఎఫ్ ప్రయోజనాలకు దూరమవుతున్నారు. ముఖ్యంగా నగరాల్లో జీవన వ్యయం పెరిగిన నేపథ్యంలో ప్రారంభ జీతాలే 18000 నుంచి 25000 రూపాయల వరకు ఉండటంతో, సామాజిక భద్రత పరిధికి బయట ఉన్న వారి సంఖ్య పెరుగుతోంది.

ఈ నేపథ్యంలో పీఎఫ్ వేతన పరిమితిని పెంచాలంటూ దాఖలైన ప్రజా ప్రయోజన వ్యాజ్యంపై విచారణ చేపట్టిన సుప్రీంకోర్టు, ఈ వ్యవస్థను పునఃసమీక్షించాల్సిన అవసరం ఉందని స్పష్టం చేసింది. ద్రవ్యోల్బణం, జీవన వ్యయం, ఉద్యోగ పరిస్థితులను దృష్టిలో పెట్టుకుని ప్రభుత్వం తన వైఖరిని వెల్లడించాలని ఆదేశించింది. కోర్టు ఇచ్చిన గడువు పూర్తయ్యేలోపు స్పష్టమైన నిర్ణయం వెలువడే అవకాశం ఉందని నిపుణులు అభిప్రాయపడుతున్నారు.

కార్మిక సంఘాలు పీఎఫ్ వేతన పరిమితిని కనీసం 30000 రూపాయలకు పెంచాలని డిమాండ్ చేస్తున్నాయి. అలా చేస్తే ఎక్కువ మంది ఉద్యోగులు పీఎఫ్ పరిధిలోకి వచ్చి, పదవీ విరమణ తర్వాత భద్రమైన ఆర్థిక భవిష్యత్తును పొందగలుగుతారని వారు చెబుతున్నారు. పీఎఫ్ పథకం 1952లో ప్రారంభమైనప్పుడు వేతన పరిమితి కేవలం 300 రూపాయలుగా ఉండగా, కాలక్రమంలో అది పెరుగుతూ 2014లో చివరిసారిగా 15000 రూపాయలకు చేరింది. అప్పటి నుంచి పదకొండు సంవత్సరాలుగా ఎలాంటి మార్పు జరగలేదు.

ఇప్పుడు పరిమితి పెరిగితే ప్రైవేట్ రంగ ఉద్యోగులకు దీర్ఘకాలిక పొదుపు అవకాశాలు మెరుగవుతాయి. అలాగే ఉద్యోగ విరమణ తర్వాత వచ్చే ఆదాయం పెరిగి, కుటుంబ భద్రతకు ఇది పెద్ద ఊరటగా మారుతుందని ఆర్థిక నిపుణులు చెబుతున్నారు. ప్రభుత్వ నిర్ణయంపై దేశవ్యాప్తంగా ఉద్యోగులు ఆసక్తిగా ఎదురుచూస్తున్నారు.