బల్లికురవలో కేజీబీవీ వసతి గదుల ఘన ప్రారంభం

- రూ.1.64 కోట్లతో గ్రామీణ బాలికలకు సురక్షిత వసతి

- బాలికల విద్యే సమాజాభివృద్ధికి పునాది: మంత్రి గొట్టిపాటి రవికుమార్

బల్లికురవ, జనవరి 9 (పీపుల్స్ మోటివేషన్):

బల్లికురవ మండలంలో రూ.1.64 కోట్ల వ్యయంతో నిర్మించిన కస్తూర్బా గాంధీ బాలికా విద్యాలయం వసతి గదులను రాష్ట్ర మంత్రి గొట్టిపాటి రవికుమార్ ఘనంగా ప్రారంభించారు. ఈ కార్యక్రమంలో సహకరించిన మంత్రి బీసీ జనార్ధన్ రెడ్డితో పాటు స్థానిక ప్రజాప్రతినిధులు, అధికారులు పాల్గొన్నారు.

ఈ సందర్భంగా మంత్రి గొట్టిపాటి రవికుమార్ మాట్లాడుతూ, గ్రామీణ ప్రాంతాల బాలికలకు నాణ్యమైన విద్యతో పాటు సురక్షితమైన వసతి సౌకర్యాలు అందించడమే ప్రభుత్వ ప్రధాన లక్ష్యమని తెలిపారు. బాలికల విద్యే సమాజాభివృద్ధికి బలమైన పునాదిగా నిలుస్తుందని, అందుకే విద్యా మౌలిక వసతులపై ప్రభుత్వం పెద్దపీట వేస్తోందని అన్నారు.

నూతనంగా నిర్మించిన వసతి గదులు విద్యార్థినులకు సౌకర్యవంతమైన వాతావరణాన్ని కల్పిస్తాయని, చదువుపై దృష్టి కేంద్రీకరించేందుకు ఇవి ఎంతో దోహదపడతాయని మంత్రి పేర్కొన్నారు. భవిష్యత్ తరాలకు మెరుగైన అవకాశాలు కల్పించాలన్న దృఢ సంకల్పంతో ప్రభుత్వం పనిచేస్తోందని స్పష్టం చేశారు.

అనంతరం మార్టూరు రోటరీ క్లబ్ సహకారంతో బాలికలకు స్పోర్ట్స్ టీ షర్ట్స్ పంపిణీ చేశారు. చదువుతో పాటు క్రీడల్లోనూ బాలికలు రాణించాలని, శారీరకంగా, మానసికంగా దృఢంగా ఎదగాలని మంత్రి ఆకాంక్షించారు. ఈ కార్యక్రమంలో విద్యార్థినులు, ఉపాధ్యాయులు, స్థానికులు పాల్గొన్నారు.