పదో తరగతి పరీక్షలు రాయనున్న వైభవ్ సూర్యవంశీ

సమస్తిపూర్ – ఫిబ్రవరి 14 – పీపుల్స్ మోటివేషన్ 

అండర్‌-19 ప్రపంచకప్‌లో భారత జట్టు విజయంలో కీలక పాత్ర పోషించిన యువ క్రికెటర్ వైభవ్ సూర్యవంశీ ఇప్పుడు పదో తరగతి పరీక్షలకు సిద్ధమయ్యాడు. ఫిబ్రవరి 17 నుంచి ప్రారంభమయ్యే పదో తరగతి బోర్డు పరీక్షలకు ఆయన హాజరు కానున్నారు. క్రీడల్లో ప్రతిభ చూపుతూ చదువులోనూ ముందుకు సాగుతున్న ఈ యువ ఆటగాడు మరోసారి అందరి దృష్టిని ఆకర్షిస్తున్నాడు.

బీహార్ రాష్ట్రంలోని సమస్తిపూర్‌లో ఉన్న పోద్దార్ పాఠశాలలో వైభవ్ పరీక్షలు రాయనున్నాడు. అండర్‌-19 టోర్నమెంట్‌లో తన అద్భుత ప్రదర్శనతో గుర్తింపు పొందిన ఆయన ప్రస్తుతం పరీక్షలపై దృష్టి సారించాడు. క్రికెట్‌లో సాధించిన విజయాలతో పాటు చదువును సమానంగా కొనసాగిస్తున్నాడని పాఠశాల వర్గాలు తెలిపాయి.

పరీక్షల సందర్భంగా వైభవ్‌కు ఎలాంటి ప్రత్యేక సౌకర్యాలు ఉండవని, ఇతర విద్యార్థుల మాదిరిగానే పరీక్షలకు హాజరవుతాడని పాఠశాల యాజమాన్యం స్పష్టం చేసింది. ఆటలో దేశానికి గర్వకారణంగా నిలిచిన వైభవ్, చదువులోనూ మంచి ఫలితాలు సాధించాలని ఉపాధ్యాయులు ఆశాభావం వ్యక్తం చేశారు.