హోరాహోరీగా కొనసాగుతున్న పోలీస్ క్రీడలు

- సైబరాబాద్ పరేడ్ గ్రౌండ్స్‌లో ఉత్సాహభరిత వాతావరణం

- రాష్ట్రవ్యాప్తంగా పోలీస్ క్రీడాకారుల పోటీలు

- మహిళా పోలీసుల ప్రతిభ ప్రత్యేక ఆకర్షణ

హైదరాబాద్, ఫిబ్రవరి 20 (పీపుల్స్ మోటివేషన్): సైబరాబాద్ పరేడ్ గ్రౌండ్స్‌లో జరుగుతున్న నాలుగో తెలంగాణ రాష్ట్ర పోలీస్ స్పోర్ట్స్ అండ్ గేమ్స్ మీట్ 2026 మూడో రోజూ ఉత్సాహభరిత వాతావరణంలో కొనసాగింది. రాష్ట్రవ్యాప్తంగా వివిధ జిల్లాలు, జోన్లు, కమిషనరేట్లు, ప్రత్యేక దళాల నుంచి తరలివచ్చిన వందలాది మంది పోలీస్ క్రీడాకారులు తమ ప్రతిభను ప్రదర్శించారు. అథ్లెటిక్స్, వాలీబాల్, కబడ్డీ వంటి ప్రధాన విభాగాల్లో పోటీలు హోరాహోరీగా సాగాయి. ప్రతి జట్టు గెలుపే లక్ష్యంగా కసితో పోటీపడింది. గ్రూప్ ఈవెంట్లలోనూ క్రీడాకారులు అత్యుత్తమ ప్రతిభ కనబరిచారు. క్రమశిక్షణ, సమన్వయం, దృఢసంకల్పం పోలీస్ క్రీడాకారుల ప్రదర్శనలో స్పష్టంగా కనిపించాయి. ముఖ్యంగా మహిళా పోలీసులు గణనీయ సంఖ్యలో పాల్గొని తమ సామర్థ్యాన్ని నిరూపించారు. అథ్లెటిక్స్ మరియు జట్టు క్రీడల్లో వారు కనబరచిన ప్రతిభ ప్రత్యేక ఆకర్షణగా నిలిచింది. మహిళా పోలీసుల ఉత్సాహం ప్రేక్షకులను ఆకట్టుకుంది. ఈ క్రీడా మహోత్సవం ద్వారా పోలీస్ సిబ్బందిలో క్రీడాస్ఫూర్తి, ఐక్యత మరింత బలపడుతుందని అధికారులు తెలిపారు. పోటీలు మరికొన్ని రోజులు కొనసాగనున్నాయి.