పిఠాపురంలో “జనసేన ఉద్యమి” సభ్యత్వ కార్యక్రమానికి శ్రీకారం

- పార్టీ ఆదేశాల మేరకు ప్రారంభం

- కేంద్ర కార్యాలయం నుంచి నమోదు ప్రక్రియ పర్యవేక్షణ

- సాధక్‌లకు సభ్యత్వ లింకుల పంపిణీ

పిఠాపురం, 19 ఫిబ్రవరి (పీపుల్స్ మోటివేషన్): జనసేన పార్టీ అధినేత  పవన్ కళ్యాణ్ ఆదేశాల మేరకు పిఠాపురం నియోజకవర్గ పరిధిలో “జనసేన ఉద్యమి” సభ్యత్వ కార్యక్రమం ఈరోజు ఉదయం ప్రారంభమైంది. పార్టీ విస్తరణలో భాగంగా చేపట్టిన ఈ కార్యక్రమానికి నాయకత్వం వహిస్తూ పార్టీ ప్రధాన కార్యదర్శి  రామ్ తల్లూరి ప్రత్యేకంగా పర్యవేక్షించారు. జనసేన పార్టీ కేంద్ర కార్యాలయం నుంచి సభ్యత్వ నమోదు సరళిని సమీక్షించిన ఆయన, నమోదు ప్రక్రియ పారదర్శకంగా, సులభంగా జరిగేలా చర్యలు తీసుకోవాలని సూచించారు. సభ్యత్వం పొందే వారికి సాంకేతిక సహాయం అందించేందుకు ప్రత్యేక ఏర్పాట్లు చేసినట్లు తెలిపారు. అదేవిధంగా “సాధక్”లుగా వ్యవహరించే కార్యకర్తలకు సభ్యత్వ నమోదు లింకులను పంపిణీ చేసినట్లు వెల్లడించారు. గ్రామ స్థాయి నుంచి నియోజకవర్గ స్థాయి వరకు పార్టీ బలోపేతానికి ఈ కార్యక్రమం దోహదపడుతుందని నాయకులు ఆశాభావం వ్యక్తం చేశారు. జనసేన ఉద్యమి సభ్యత్వ కార్యక్రమం ద్వారా యువత, మహిళలు, వివిధ వర్గాల ప్రజలు పెద్దఎత్తున పార్టీలో చేరే అవకాశం ఉందని పార్టీ వర్గాలు పేర్కొన్నాయి.