లండన్ అగ్నిప్రమాదంలో తెలుగు యువకుడు మృతి

• పెద్దాపురం నియోజకవర్గానికి చెందిన అభిషేక్ దుర్మరణం
• ఉన్నత చదువుల కోసం వెళ్లి విషాదాంతం
• మృతదేహాన్ని స్వదేశానికి తీసుకురావాలని కుటుంబం విజ్ఞప్తి

కాకినాడ, ఫిబ్రవరి 25 (పీపుల్స్ మోటివేషన్): ఉన్నత విద్య కోసం విదేశాలకు వెళ్లిన ఓ తెలుగు యువకుడు లండన్‌లో జరిగిన అగ్నిప్రమాదంలో మృతి చెందడం తీవ్ర విషాదాన్ని మిగిల్చింది. కాకినాడ జిల్లా పెద్దాపురం నియోజకవర్గ పరిధిలోని కొండయ్యపేటకు చెందిన గొంతి అభిషేక్ (28) ఈ ప్రమాదంలో ప్రాణాలు కోల్పోయాడు. ఈ వార్తతో గ్రామంలో తీవ్ర విషాద వాతావరణం నెలకొంది. అభిషేక్ తండ్రి ఆస్కారరావు ఆగిరిపల్లి ప్రాథమిక ఆరోగ్య కేంద్రంలో సీహెచ్‌ఓగా విధులు నిర్వహిస్తున్నారు. తన కుమారుడు ఉన్నత విద్యావంతుడిగా ఎదగాలని ఆశించి మూడేళ్ల క్రితం లండన్‌కు ఎంబీఏ చదవడానికి పంపించారు. చదువు పూర్తి చేసిన అనంతరం అభిషేక్ అక్కడే ఒక సంస్థలో ఉద్యోగం సంపాదించి స్థిరపడ్డాడు. కేవలం ఆరు నెలల క్రితం స్వగ్రామానికి వచ్చి కుటుంబ సభ్యులతో సమయం గడిపి తిరిగి వెళ్లాడు.

అగ్నిప్రమాదం జరిగిన రోజు ఆయన నివసిస్తున్న రెండంతస్తుల భవనంలో ఒక్కసారిగా మంటలు చెలరేగినట్లు సమాచారం. ప్రమాద సమయంలో లోపలే చిక్కుకుపోయిన అభిషేక్, మంటల కారణంగా ఊపిరాడక మృతి చెందినట్లు తెలుస్తోంది. స్థానిక అగ్నిమాపక సిబ్బంది సంఘటనా స్థలానికి చేరుకుని మంటలను అదుపులోకి తీసుకున్నప్పటికీ అప్పటికే ఆలస్యమైంది. అభిషేక్ మృతదేహాన్ని వీలైనంత త్వరగా స్వస్థలానికి తీసుకురావాలని కుటుంబ సభ్యులు, గ్రామస్తులు ప్రభుత్వాన్ని కోరుతున్నారు. గ్రామంలో విషాద ఛాయలు అలుముకోగా, కుటుంబం తీవ్ర శోకసంద్రంలో మునిగిపోయింది.