విజయ్ దేవరకొండ – రష్మిక మందన్న పెళ్లి ఉదయ్‌పూర్‌లో..? రిసెప్షన్ సంగతేంటి?

టాలీవుడ్‌లో అత్యంత పాపులర్ జంటలలో ఒకటిగా గుర్తింపు పొందిన విజయ్ దేవరకొండ – రష్మిక మందన్న పెళ్లి వార్తలు మరోసారి సినీ వర్గాల్లో హాట్ టాపిక్‌గా మారాయి. గత కొన్నేళ్లుగా ఈ ఇద్దరూ ప్రేమలో ఉన్నారనే ప్రచారం సోషల్ మీడియాలో తరచూ వినిపిస్తుండగా, తాజాగా వీరి వివాహంపై కొత్తగా ఊహాగానాలు మొదలయ్యాయి. కలిసి పలు సినిమాల్లో నటించిన తర్వాత వీరి మధ్య సన్నిహిత్యం పెరిగి, అది ప్రేమగా మారిందని అభిమానులు భావిస్తున్నారు.

ఇటీవల ఈ జంట సైలెంట్‌గా ఎంగేజ్మెంట్ కూడా చేసుకున్నారనే వార్తలు ప్రచారంలోకి రావడంతో పెళ్లి ఎప్పుడు జరుగుతుందన్న ఆసక్తి మరింత పెరిగింది. తాజా సమాచారం ప్రకారం ఫిబ్రవరి 26న రాజస్థాన్‌లోని ఉదయ్‌పూర్‌లో ఒక ప్రైవేట్ ప్యాలెస్‌లో వీరి వివాహం జరగనుందని టాక్ వినిపిస్తోంది. కుటుంబ సభ్యులు, అత్యంత సన్నిహితులు మాత్రమే ఈ వేడుకకు హాజరవుతారని సినీ వర్గాల్లో చర్చ సాగుతోంది. ప్రస్తుతం ఇద్దరూ తమ తమ సినిమాలతో బిజీగా ఉన్నప్పటికీ, పెళ్లి కోసం ప్రత్యేకంగా సమయం కేటాయించనున్నట్లు ప్రచారం జరుగుతోంది.

వివాహం అనంతరం మార్చి 4న హైదరాబాద్‌లోని ఓ ప్రముఖ హోటల్‌లో గ్రాండ్ రిసెప్షన్ నిర్వహించే ఆలోచనలో ఉన్నారని సమాచారం. ఈ వేడుకకు టాలీవుడ్‌కు చెందిన పలువురు స్టార్ హీరోలు, దర్శకులు, నిర్మాతలు హాజరయ్యే అవకాశముందని టాక్ వినిపిస్తోంది. అభిమానులు కూడా ఈ ఈవెంట్ కోసం ఆసక్తిగా ఎదురుచూస్తున్నారు.

విజయ్ దేవరకొండ – రష్మిక మందన్న జంట ఇప్పటికే ‘గీత గోవిందం’, ‘డియర్ కామ్రేడ్’ చిత్రాల్లో కలిసి నటించి మంచి కెమిస్ట్రీతో ప్రేక్షకులను ఆకట్టుకుంది. ఈ సినిమాల తర్వాత వీరి ఆన్‌స్క్రీన్ జోడీకి ప్రత్యేకమైన ఫాలోయింగ్ ఏర్పడింది. ప్రస్తుతం మరోసారి ఈ జంట ‘రణబలి’ అనే ప్రాజెక్ట్‌లో కలిసి నటించబోతున్నట్లు ప్రచారం జరుగుతోంది. పెళ్లి తర్వాత కొంత విరామం తీసుకుని తిరిగి షూటింగ్‌లలో పాల్గొననున్నారని కూడా వార్తలు వినిపిస్తున్నాయి.

అయితే ఇప్పటివరకు ఈ పెళ్లి విషయంపై విజయ్ దేవరకొండ లేదా రష్మిక మందన్న నుంచి ఎలాంటి అధికారిక ప్రకటన రాలేదు. దీంతో ఇది నిజమేనా? లేక కేవలం సోషల్ మీడియాలో ప్రచారంలో ఉన్న రూమరేనా? అన్నది అధికారిక క్లారిటీ వచ్చిన తర్వాతే తేలాల్సి ఉంది.