అదుపుతప్పి కల్వర్ట్‌ను ఢీకొట్టిన వ్యాన్.. ముగ్గురు మృతి

• నాగర్‌కర్నూలులో ఘోర రోడ్డు ప్రమాదం
• మృతుల్లో ఇద్దరు మహిళలు
• కర్ణాటక నుంచి శ్రీశైలం వెళ్తుండగా విషాదం

నాగర్‌కర్నూలు, 14 ఫిబ్రవరి 2026 (పీపుల్స్ మోటివేషన్): నాగర్‌కర్నూలు జిల్లాలో ఘోర రోడ్డు ప్రమాదం చోటుచేసుకుంది. ఊర్కొండ మండలం తిమ్మన్నపల్లి శివారులో వ్యాన్ అదుపుతప్పి కల్వర్ట్‌ను ఢీకొట్టడంతో ముగ్గురు అక్కడికక్కడే మృతి చెందారు. మృతుల్లో ఇద్దరు మహిళలు ఉన్నట్లు పోలీసులు తెలిపారు. ప్రమాదంలో పలువురు తీవ్రంగా గాయపడ్డారు. ప్రమాద సమయంలో వ్యాన్‌లో మొత్తం 10 మంది ప్రయాణికులు ఉన్నట్లు సమాచారం. వీరంతా కర్ణాటకకు చెందిన వారిగా గుర్తించారు. కర్ణాటక నుంచి శ్రీశైలం వైపు వెళ్తుండగా ఈ దుర్ఘటన జరిగినట్లు ప్రాథమికంగా తెలుస్తోంది. ప్రమాదానికి గల ఖచ్చితమైన కారణాలు ఇంకా తెలియాల్సి ఉంది.

ప్రమాద సమాచారం అందుకున్న వెంటనే పోలీసులు, అంబులెన్స్ సిబ్బంది సంఘటనా స్థలానికి చేరుకుని సహాయక చర్యలు చేపట్టారు. గాయపడిన వారిని సమీప ఆసుపత్రులకు తరలించి చికిత్స అందిస్తున్నారు. మృతదేహాలను పోస్టుమార్టం నిమిత్తం తరలించినట్లు అధికారులు తెలిపారు. ఈ ఘటనతో స్థానికంగా విషాద వాతావరణం నెలకొంది. ప్రమాదంపై కేసు నమోదు చేసి పోలీసులు దర్యాప్తు చేస్తున్నారు. వాహనం వేగం, డ్రైవర్ నిర్లక్ష్యం వంటి కోణాల్లో విచారణ కొనసాగిస్తున్నట్లు సమాచారం.