నల్గొండలో తాగుబోతుల వీరంగం

• ఇంట్లో నుంచి యువకుడిని లాక్కొచ్చి దాడి
• దాడి వీడియో చిత్రీకరించి సోషల్ మీడియాలో ప్రచారం
• కేసు నమోదు చేసి దర్యాప్తు ప్రారంభం

నల్గొండ, ఫిబ్రవరి 25 (పీపుల్స్ మోటివేషన్): నల్గొండ జిల్లాలో అర్ధరాత్రి తాగుబోతుల వీరంగం కలకలం రేపింది. నిడుమనూరు గ్రామంలో మద్యం మత్తులో ఉన్న ఓ రౌడీ గ్యాంగ్, ఒక యువకుడిని ఇంటి నుంచి బలవంతంగా లాక్కొచ్చి విచక్షణారహితంగా దాడి చేసిన ఘటన వెలుగులోకి వచ్చింది. సమాచారం ప్రకారం, దుండగులు యువకుడిని కాళ్లతో తన్నుతూ, పిడిగుద్దులు గుద్దుతూ దారుణంగా కొట్టారు. ఈ దాడిని వీడియోగా చిత్రీకరించి సోషల్ మీడియాలో అప్లోడ్ చేసినట్లు తెలుస్తోంది. తమ జోలికి వస్తే ఎవరికైనా ఇదే గతి పడుతుందని బెదిరింపులు కూడా చేసినట్లు సమాచారం. ఈ ఘటనపై బాధితుడు పోలీసులకు ఫిర్యాదు చేయడంతో కేసు నమోదు చేశారు. దాడికి పాల్పడిన వారిని గుర్తించేందుకు పోలీసులు చర్యలు ప్రారంభించారు. వీడియో ఆధారంగా నిందితుల గుర్తింపుపై దృష్టి సారించారు. గ్రామంలో శాంతిభద్రతలు కాపాడేందుకు అదనపు బలగాలను మోహరించినట్లు సమాచారం. దాడికి బాధ్యులైన వారిపై కఠిన చర్యలు తీసుకుంటామని పోలీసులు తెలిపారు.