కన్న కూతురిని హతమార్చిన తల్లి

- ప్రియుడు కోసం పసిపాప ప్రాణాలు బలి

- గుట్టుచప్పుడు కాకుండా పాతిపెట్టిన దారుణం

- ఫోన్ సిగ్నల్ ఆధారంగా నిందితురాలి అరెస్ట్

తిరుపతి, ఫిబ్రవరి 25 (పీపుల్స్ మోటివేషన్): తిరుపతిలో హృదయ విదారక ఘటన వెలుగుచూసింది. రెండున్నర ఏళ్ల చిన్నారి దుర్గను ఆమె తల్లి ఆశలతా హత్య చేసినట్లు పోలీసులు వెల్లడించారు. ప్రియుడి మోజులో పడి కన్న ప్రేమను మరిచిన తల్లి ఈ దారుణానికి పాల్పడినట్లు విచారణలో తేలింది. పెళ్లికి అడ్డొస్తుందనే నెపంతో చిన్నారిని హతమార్చిన ఆశలతా, అనంతరం గుట్టుచప్పుడు కాకుండా పాప మృతదేహాన్ని పాతిపెట్టినట్లు సమాచారం. మనవరాలు కనిపించడం లేదని అమ్మమ్మ పోలీసులకు ఫిర్యాదు చేయడంతో ఈ ఘటన వెలుగులోకి వచ్చింది. ఈస్ట్ పోలీస్ స్టేషన్ సిబ్బంది కేసు నమోదు చేసి దర్యాప్తు ప్రారంభించారు. ఫోన్ సిగ్నల్ ఆధారంగా ఆశలతను పోలీసులు అదుపులోకి తీసుకున్నారు. విచారణలో ఆమె నేరాన్ని అంగీకరించినట్లు అధికారులు తెలిపారు. ఏర్పేడు మండలం పాపానాయుడు పేట సమీపంలోని స్వర్ణముఖి నది ఒడ్డున మృతదేహాన్ని పూడ్చిపెట్టినట్లు ఆమె చెప్పినట్లు సమాచారం. మరికొద్ది సేపట్లో ఎమ్మార్వో సమక్షంలో మృతదేహాన్ని వెలికితీసి పంచనామా నిర్వహించనున్నట్లు పోలీసులు తెలిపారు. అనంతరం పోస్టుమార్టం కోసం ఆసుపత్రికి తరలించనున్నారు. ఈ ఘటన స్థానికంగా తీవ్ర కలకలం రేపింది.