శిక్ష విధించిన జడ్జికి బెదిరింపులు… బిజ్‌నోర్‌లో కలకలం

• హత్య కేసులో ఇద్దరికి జీవిత ఖైదు
• తీర్పు అనంతరం జడ్జికి బెదిరింపులు
• న్యాయమూర్తికి అదనపు భద్రత ఏర్పాటు

బిజ్‌నోర్, ఫిబ్రవరి 27 (పీపుల్స్ మోటివేషన్): కారుతో ఢీకొట్టి ఒక వ్యక్తిని హత్య చేసిన కేసులో ఇద్దరు నిందితులకు జీవిత ఖైదు శిక్ష విధించగా, వారు న్యాయమూర్తిని బెదిరించిన సంఘటన ఉత్తరప్రదేశ్‌లోని బిజ్‌నోర్‌లో చోటుచేసుకుంది. ఈ ఘటనతో కోర్టు ప్రాంగణంలో ఉద్రిక్తత నెలకొంది. 2024లో జరిగిన ఈ కేసును అదనపు జిల్లా, సెషన్స్ జడ్జి నిజేంద్ర కుమార్ విచారించారు. నిందితులుగా తేలిన జైదీప్, పింటూ చౌహాన్‌లకు జీవిత ఖైదు విధిస్తూ తీర్పు వెలువరించారు. కోర్టులో తీర్పు ప్రకటించగానే నిందితులు ఆగ్రహంతో స్పందించారు. “మీ ఇల్లు ఎక్కడో తెలుసు, మిమ్మల్ని విడిచిపెట్టేది లేదు” అంటూ జడ్జిని బెదిరించారని సమాచారం. ఈ సంఘటనతో భద్రతా సిబ్బంది వెంటనే జోక్యం చేసుకుని పరిస్థితిని అదుపులోకి తీసుకొచ్చారు. కోర్టు ఆవరణలో అదనపు భద్రతా చర్యలు చేపట్టారు.

నిందితుల బెదిరింపుల నేపథ్యంలో జడ్జికి అదనపు భద్రత కల్పించినట్లు సర్కిల్ ఇన్‌స్పెక్టర్ సంగ్రామ్ సింగ్ తెలిపారు. న్యాయవ్యవస్థపై ఇలాంటి చర్యలను సహించబోమని పోలీసులు స్పష్టం చేశారు. కేసు నేపథ్యంలో మరింత అప్రమత్తంగా ఉండాలని అధికారులకు ఆదేశాలు జారీ చేసినట్లు తెలిపారు.