బీసీ సంక్షేమ శాఖపై ముఖ్యమంత్రి సమీక్ష

హాస్టళ్లలో శానిటేషన్, ఆహార నాణ్యతకు ప్రాధాన్యం

మార్చిలోగా 814 హాస్టళ్లలో ఆర్వో ప్లాంట్లు

అమరావతి, ఫిబ్రవరి 4 (పీపుల్స్ మోటివేషన్):

ముఖ్యమంత్రి నారా చంద్రబాబు నాయుడు బుధవారం రాష్ట్ర సచివాలయంలో బీసీ సంక్షేమ శాఖపై సమీక్ష సమావేశం నిర్వహించారు. ఈ సందర్భంగా బీసీ హాస్టళ్లలో శానిటేషన్, ఆహార పదార్థాల నాణ్యతపై ప్రత్యేక దృష్టి సారించాలని అధికారులను ఆదేశించారు. రెసిడెన్షియల్ పాఠశాలలు, హాస్టళ్ల నిర్మాణాన్ని వేగవంతం చేయాలని సీఎం సూచించారు. విద్యార్థులకు సురక్షిత తాగునీరు అందించేందుకు 814 హాస్టళ్లలో రూ.17 కోట్ల వ్యయంతో మార్చి నెలలోగా ఆర్వో ప్లాంట్ల ఏర్పాటు పూర్తి చేస్తామని అధికారులు తెలిపారు. అలాగే రూ.60 కోట్ల సాస్కి నిధులతో కొత్త రెసిడెన్షియల్ పాఠశాలలు, హాస్టళ్ల నిర్మాణం చేపట్టాలని సీఎం ఆదేశాలు జారీ చేశారు.

విద్యార్థుల ఆరోగ్యం, భద్రతకు ఎలాంటి రాజీ ఉండకూడదని, వసతి గృహాల్లో మౌలిక వసతులు ప్రమాణాలకు అనుగుణంగా ఉండాలని ముఖ్యమంత్రి స్పష్టం చేశారు. ఈ సమీక్ష సమావేశంలో బీసీ సంక్షేమ శాఖ మంత్రి ఎస్. సవిత తో పాటు శాఖ ఉన్నతాధికారులు పాల్గొన్నారు.