నకిలీ చలానాలతో సైబర్ మోసాలు

- ఆంధ్రప్రదేశ్‌లో పెరుగుతున్న ఘటనలు

- ప్రజలకు పోలీసుల హెచ్చరికలు

అమరావతి, ఫిబ్రవరి 16 (పీపుల్స్ మోటివేషన్): ఆంధ్రప్రదేశ్‌లో ట్రాఫిక్ చలానాల పేరుతో సైబర్ మోసాలు పెరుగుతున్నాయి. ట్రాఫిక్ ఉల్లంఘనలు చేశారంటూ నకిలీ సందేశాలు పంపించి ప్రజల బ్యాంకు ఖాతాల్లోని సొమ్మును దోచుకుంటున్నారు. అసలైన చలానాల్లాగే కనిపించే లింకులు పంపడంతో చాలామంది మోసపోతున్నారు. రవాణా శాఖ, ట్రాఫిక్ పోలీసుల పేరుతో పెండింగ్ చలానా ఉందంటూ సందేశాలు పంపిస్తున్నారు. జరిమానా చెల్లించేందుకు అందులో ఇచ్చిన లింకుపై నొక్కాలని సూచిస్తున్నారు. జరిమానా మొత్తాన్ని తక్కువగా చూపించి నమ్మకం కలిగిస్తారు. లింకుపై నొక్కగానే నకిలీ వెబ్‌సైటుకు దారి తీస్తుంది. అక్కడ ఓటీపీలు, కార్డు వివరాలు నమోదు చేయాలని కోరుతుంది. వివరాలు నమోదు చేసిన వెంటనే ఖాతాలోని సొమ్ము మాయం అవుతోంది. కొన్ని సందర్భాల్లో అనువర్తన ఫైళ్లు పంపించి వాటిని తెరిస్తే దుష్ట సాఫ్ట్‌వేర్ ఫోన్‌లో చేరి పూర్తి నియంత్రణను నేరగాళ్లకు ఇస్తోంది. విజయవాడలో ఒక వ్యక్తి నకిలీ చలానా లింకుపై నొక్కగా అతని కార్డుల నుంచి రూ.1.78 లక్షలు పోయాయి. మరో వ్యక్తి నకిలీ అనువర్తనం తెరిచిన కొద్దిసేపటికే రూ.2.10 లక్షలు కోల్పోయాడు. ఇటువంటి ఘటనలు రాష్ట్రంలో పలుచోట్ల నమోదవుతున్నాయి.

ఇలాంటి సందేశాలకు స్పందించవద్దని పోలీసులు హెచ్చరిస్తున్నారు. అధికారిక వెబ్‌సైట్ల ద్వారా మాత్రమే చలానా వివరాలు పరిశీలించాలని సూచిస్తున్నారు. తెలియని లింకులను నొక్కకూడదని, వ్యక్తిగత మరియు బ్యాంకు వివరాలను ఎట్టి పరిస్థితుల్లోనూ పంచుకోకూడదని స్పష్టం చేస్తున్నారు. జాగ్రత్తగా ఉంటేనే సైబర్ మోసాల నుంచి రక్షణ పొందవచ్చని అధికారులు తెలిపారు.