హోలీ, దీపావళి పండుగల వేళ ఉచిత గ్యాస్ సిలిండర్లు.. పేద కుటుంబాలకు భారీ ఊరట..!

న్యూఢిల్లీ – 04 ఫిబ్రవరి 2026 – పీపుల్స్ మోటివేషన్ 

రాజధాని ఢిల్లీలో నివసిస్తున్న పేద కుటుంబాలకు పండుగల వేళ పెద్ద ఊరట లభించనుంది. భారతీయ జనతా పార్టీ నేతృత్వంలోని ఢిల్లీ ప్రభుత్వం ప్రతి ఏడాది హోలీ, దీపావళి సందర్భంగా రెండు ఉచిత ఎల్‌పీజీ గ్యాస్ సిలిండర్లను అందించేందుకు కీలక నిర్ణయం తీసుకుంది. ఎన్నికల సమయంలో ఇచ్చిన హామీని అమలు చేస్తూ ఈ పథకాన్ని ఢిల్లీ క్యాబినెట్ అధికారికంగా ఆమోదించింది.

ఢిల్లీ ముఖ్యమంత్రి రేఖా గుప్తా తెలిపిన వివరాల ప్రకారం, చెల్లుబాటు అయ్యే రేషన్ కార్డు కలిగి ఉన్న ఆర్థికంగా బలహీన వర్గాలకు చెందిన కుటుంబాలకు ఈ పథకం వర్తిస్తుంది. ముఖ్యంగా తక్కువ ఆదాయ కుటుంబాల్లోని మహిళలకు ఈ నిర్ణయం గణనీయమైన ఉపశమనంగా నిలవనుంది. హోలీ, దీపావళి పండుగల సమయంలో ఒక్కో కుటుంబానికి ఒక్కో ఉచిత సిలిండర్ అందించే విధంగా ఈ పథకాన్ని అమలు చేయనున్నారు.

ఈ పథకం కింద ఎల్‌పీజీ సిలిండర్ ధరకు సమానమైన మొత్తాన్ని డైరెక్ట్ బెనిఫిట్ ట్రాన్స్‌ఫర్ విధానం ద్వారా లబ్ధిదారుల బ్యాంకు ఖాతాల్లో జమ చేయనున్నారు. ప్రస్తుతం ఒక సిలిండర్ ధరగా నిర్ణయించిన రూ.853ను నేరుగా ఖాతాల్లోకి బదిలీ చేస్తారు. పైప్డ్ నేచురల్ గ్యాస్ కనెక్షన్ ఉన్న రేషన్ కార్డుదారులకు కూడా ఈ పథకం వర్తిస్తుందని ప్రభుత్వం స్పష్టం చేసింది.

హోలీ పండుగకు ముందే అర్హులైన లబ్ధిదారుల ఖాతాల్లో ఈ మొత్తాన్ని జమ చేయనున్నట్లు ముఖ్యమంత్రి వెల్లడించారు. ఈ ఉచిత గ్యాస్ సిలిండర్ పథకానికి ప్రభుత్వం రూ.242 కోట్లను కేటాయించినట్లు తెలిపారు. పేద ప్రజల జీవనభారం తగ్గించడమే లక్ష్యంగా ఈ నిర్ణయం తీసుకున్నామని, ఎన్నికల్లో ఇచ్చిన హామీలను అమలు చేయడంలో తమ ప్రభుత్వం కట్టుబడి ఉందని సీఎం రేఖా గుప్తా పేర్కొన్నారు.