రేవంత్ ప్రభుత్వంపై ధర్మపురి అరవింద్ విమర్శలు

• బండి సంజయ్‌ను వారియర్‌గా అభివర్ణించిన ఎంపీ
• కార్పొరేటర్ల ఎత్తుకెళ్లింపులపై హెచ్చరిక
• నిజామాబాద్ ఫలితాల్లో బీజేపీ ఆధిక్యం అని వ్యాఖ్య

నిజామాబాద్, 14 ఫిబ్రవరి 2026 (పీపుల్స్ మోటివేషన్): నిజామాబాద్‌లో మీడియాతో మాట్లాడిన ఎంపీ ధర్మపురి అరవింద్ రాష్ట్ర రాజకీయాలపై తీవ్ర వ్యాఖ్యలు చేశారు. బండి సంజయ్ ఒక వారియర్ అని, ఆయన అర్జునుడి పాత్రకు సరిపోతారని అభిప్రాయపడ్డారు. రాష్ట్రంలో కాంగ్రెస్ బలమైన ప్రభుత్వం కాదని, ముఖ్యమంత్రి రేవంత్ రెడ్డి బలమైన స్థాయిలో లేరని అన్నారు. మున్సిపల్ వార్డు సభ్యులు, కార్పొరేటర్లను బలవంతంగా ఎత్తుకెళ్తే బీఆర్ఎస్‌కు పట్టిన గతే కాంగ్రెస్‌కు పడుతుందని హెచ్చరించారు. ముఖ్యమంత్రి రేవంత్ రెడ్డిని ప్రజలు ఇప్పటికే ఛీకొడుతున్నారని, కార్పొరేటర్లను ఎత్తుకెళ్లే ప్రయత్నాలు చేస్తే మరింత ప్రతికూలత ఎదురవుతుందని వ్యాఖ్యానించారు. నిజామాబాద్ కార్పొరేషన్ ఫలితాల్లో కాంగ్రెస్, బీఆర్ఎస్ కంటే ఎక్కువ స్థానాలు బీజేపీ గెలుచుకుందని తెలిపారు. తన పార్లమెంట్ పరిధిలో కూడా బీఆర్ఎస్ కంటే ఎక్కువ సీట్లు సాధించామని వెల్లడించారు. కాంగ్రెస్ లౌకిక వాద పార్టీ కాదని, ఓ బ్రోకర్ పార్టీగా మారిందని విమర్శించారు. ప్రభుత్వం పోలీసు శాఖను దుర్వినియోగం చేస్తోందని అరవింద్ ఆరోపించారు. తమ పార్టీ అభ్యర్థులను పోలింగ్ బూత్‌ల నుంచి పంపించారని, వారిపై కేసు పెట్టాలని తాను భావించగా పోలీసులే తనపై కేసు నమోదు చేశారని అన్నారు. కాంగ్రెస్ పార్టీకి ఓటు వేయాలని పోలీసులు సూచించారనే ఆరోపణలు కూడా చేశారు. బీఆర్ఎస్ కార్పొరేటర్లను ఎత్తుకెళ్లేందుకు కాంగ్రెస్‌కు పోలీసులు సహకరిస్తున్నారని విమర్శించారు.

కేసీఆర్‌ను తెలంగాణ ప్రజలు రాజకీయాలను భ్రష్టు పట్టించారనే కారణంతో ఓడించారని, ఇప్పుడు రేవంత్ రెడ్డి అదే దారిలో నడుస్తున్నారని మండిపడ్డారు. రాజకీయాల్లో హుందాతనం అవసరమని, ఎవరికి మద్దతు ఇవ్వాలనేది కార్పొరేటర్ల స్వేచ్ఛ అని అన్నారు. బలవంతపు రాజకీయాలు సరికాదని హెచ్చరించారు. కరీంనగర్‌లో బండి సంజయ్ ఆధ్వర్యంలో మున్సిపల్ ఎన్నికల్లో బీజేపీ సత్తా చాటిందని ప్రశంసించారు.