ఏపీలో కొత్త ఫిల్మ్ సిటీపై చర్చలు…

• సంజయ్ దత్‌తో లోకేశ్ భేటీ
• ముంబైలో ఆత్మీయ సమావేశం
• ఏపీలో ఫిల్మ్ సిటీ ఏర్పాటు ప్రతిపాదన
• సింగిల్ విండో అనుమతుల విధానంపై చర్చ

ముంబై, ఫిబ్రవరి 27 (పీపుల్స్ మోటివేషన్): ఆంధ్రప్రదేశ్‌లో సినీ పరిశ్రమకు అనుకూల వాతావరణం కల్పించే దిశగా కీలక చర్చలు జరుగుతున్నాయి. ఈ నేపథ్యంలో రాష్ట్ర మంత్రి నారా లోకేష్ ముంబైలో ప్రముఖ బాలీవుడ్ నటుడు సంజయ్ దత్ను కలిశారు. ఈ సమావేశంలో ఏపీలో కొత్త ఫిల్మ్ సిటీ ఏర్పాటు అవకాశాలపై విస్తృతంగా చర్చించినట్లు లోకేష్ తెలిపారు. సినిమా షూటింగ్‌లకు అవసరమైన మౌలిక సదుపాయాలు, ఆధునిక స్టూడియోలు, సాంకేతిక వనరులు అందుబాటులోకి తీసుకురావాలనే లక్ష్యంతో ప్రభుత్వం కసరత్తు చేస్తోందని వెల్లడించారు. సినిమా చిత్రీకరణలకు సింగిల్ విండో అనుమతి విధానాన్ని ప్రవేశపెట్టే అంశంపైనా చర్చించినట్లు తెలిపారు. అనుమతుల ప్రక్రియను సులభతరం చేసి, దేశవ్యాప్తంగా మరియు అంతర్జాతీయ స్థాయిలోని నిర్మాణ సంస్థలను ఆకర్షించాలనే ఉద్దేశంతో ప్రభుత్వం ముందుకు సాగుతోందన్నారు. ఆంధ్రప్రదేశ్‌ను సినీ చిత్రీకరణలకు హబ్‌గా మార్చే దిశగా ప్రత్యేక ‘సినీ షూటింగ్ ఎకోసిస్టమ్’ను రూపొందించాలనే ఆలోచనపై తాను ఉత్సాహంగా ఉన్నట్లు లోకేష్ పేర్కొన్నారు. ఈ భేటీ రాష్ట్రంలో సినిమా పరిశ్రమ విస్తరణకు కొత్త అవకాశాలకు నాంది కావొచ్చని భావిస్తున్నారు.