ఏపీ సీఎం చంద్రబాబుతో తెలంగాణ మంత్రి తుమ్మల భేటీ

- రెండు రాష్ట్రాల సమన్వయంపై చర్చ

- సరిహద్దు అభివృద్ధి అంశాలు ప్రస్తావన

అమరావతి, ఫిబ్రవరి 16 (పీపుల్స్ మోటివేషన్): ఆంధ్రప్రదేశ్ ముఖ్యమంత్రి నారా చంద్రబాబు నాయుడుతో తెలంగాణ వ్యవసాయ శాఖ మంత్రి తుమ్మల నాగేశ్వరరావు భేటీ అయ్యారు. రెండు రాష్ట్రాల మధ్య సమన్వయం, పరస్పర సహకారంతో పరిష్కరించాల్సిన పలు కీలక అంశాలను ఈ సందర్భంగా ప్రస్తావించారు.

రెండు రాష్ట్రాల సరిహద్దు ప్రాంతాల్లో అభివృద్ధి పనులను వేగవంతం చేయాల్సిన అవసరాన్ని మంత్రి తుమ్మల వివరించారు. ముఖ్యంగా రహదారులు, సాగునీటి ప్రాజెక్టులు, రైల్వే మార్గాల నిర్మాణం పూర్తిచేస్తే తెలుగు రాష్ట్రాల ప్రజలకు మరింత లాభం చేకూరుతుందని ఆయన అభిప్రాయపడ్డారు. ఈ ప్రాజెక్టులకు సంబంధించిన వివరణాత్మక వివరాలను ముఖ్యమంత్రికి సమర్పించినట్లు తెలిపారు. ఇరు రాష్ట్రాల ప్రభుత్వాలు ఉన్నత స్థాయి చర్చల ద్వారా పెండింగ్ సమస్యలను పరిష్కరించగలవని తుమ్మల నాగేశ్వరరావు విశ్వాసం వ్యక్తం చేశారు. ప్రజల ప్రయోజనాల దృష్ట్యా పరస్పర అవగాహనతో ముందుకు సాగాల్సిన అవసరం ఉందని పేర్కొన్నారు.