లడ్డూ కల్తీపై అచ్చెన్నాయుడు ఆగ్రహం

వైసీపీ నేతలపై ఘాటైన విమర్శలు

సభలో ఆధారాలు చూపాలని సవాల్

హిందూ భావోద్వేగాలపై రాజకీయం చేయొద్దని హెచ్చరిక

అమరావతి, ఫిబ్రవరి 17 (పీపుల్స్ మోటివేషన్): తిరుమల లడ్డూ ప్రసాదం కల్తీ వ్యవహారంపై తెలుగుదేశం పార్టీ రాష్ట్ర అధ్యక్షుడు కింజరాపు అచ్చెన్నాయుడు వైసీపీ నేతలపై తీవ్రంగా మండిపడ్డారు. నాటి తిరుమల తిరుపతి దేవస్థానం చైర్మన్ సుబ్బారెడ్డి స్వయంగా కల్తీ జరిగిందని ఒప్పుకున్న తర్వాత కూడా వైసీపీ నాయకులు ఎదురుదాడి చేయడం దుర్మార్గమని విమర్శించారు. కోట్లాది హిందువుల మనోభావాలను దెబ్బతీసే విధంగా పవిత్ర ప్రసాదాన్ని అపవిత్రం చేసిన పార్టీకి ధర్మం గురించి మాట్లాడే నైతిక హక్కు లేదని అచ్చెన్నాయుడు పేర్కొన్నారు. శ్రీవారి ఆలయానికి వెళ్తూ హిందూ సంప్రదాయాల ప్రకారం డిక్లరేషన్ ఇవ్వడంపై ఎందుకు వెనుకంజ వేస్తున్నారని ప్రశ్నించారు.

హెరిటేజ్ సంస్థపై ఆధారాలు లేకుండా ఆరోపణలు చేయడం మానేయాలని, ధైర్యముంటే సభలో స్పష్టమైన ఆధారాలు చూపాలని సవాల్ విసిరారు. రాజకీయ ప్రయోజనాల కోసం మతభావాలను ఉపయోగించకూడదని హెచ్చరించారు. వ్యవస్థలను భ్రష్టుపట్టించి హిందూ ధర్మంపై దాడులకు పాల్పడిన వారిని వదిలిపెట్టబోమని స్పష్టం చేశారు. సత్యం ఎప్పటికైనా గెలుస్తుందని, తప్పు చేసిన వారు శిక్ష అనుభవించాల్సిందేనని అచ్చెన్నాయుడు వ్యాఖ్యానించారు.