యనమలకుదురు శివాలయంలో రూ.10 లక్షల నగదు మాయం… పరారీలో ఈవో

• హుండీ తాళం మార్చి నగదు చోరీ చేసినట్లు ఆరోపణలు
• ఇద్దరు పూజారులతో పాటు మరొకరు అరెస్ట్
• దేవాదాయశాఖ విచారణ కొనసాగింపు

విజయవాడ, 11 మార్చి (పీపుల్స్ మోటివేషన్) : విజయవాడ సమీపంలోని యనమలకుదురు శివాలయంలో రూ.10 లక్షలకు పైగా నగదు మాయం అయిన ఘటన కలకలం రేపింది. ఈ ఘటనపై దేవాదాయశాఖ అధికారులు విచారణ చేపట్టారు. ఆలయ ఈవోతో పాటు అర్చకులు కలిసి అంతరాలయంలోని హుండీకి మారు తాళం తయారు చేసి నగదు చోరీ చేసినట్లు ఆరోపణలు వెలుగులోకి వచ్చాయి. హుండీ నుంచి నగదు పంపకాల సమయంలో తేడాలు రావడంతో ఈ వ్యవహారం బయటపడింది. సమాచారం ప్రకారం నగదు పంపకాల విషయంలో తలెత్తిన వివాదం నేపథ్యంలో కొందరు మద్యం దుకాణంలో చర్చించుకోవడం వల్ల విషయం వెలుగులోకి వచ్చినట్లు తెలుస్తోంది. ఈ ఘటనపై ఆలయ ట్రస్ట్ చైర్మన్ సంగా నరసింహారావు ఫిర్యాదు చేయడంతో పోలీసులు కేసు నమోదు చేశారు. పోలీసులు విచారణ చేపట్టి ఇద్దరు పూజారులతో పాటు మరొక వ్యక్తిని అరెస్ట్ చేశారు. అయితే ఈ ఘటనలో ప్రధాన పాత్ర ఉందని ఆరోపణలు ఎదుర్కొంటున్న ఆలయ ఈవో భవానీ పరారీలో ఉన్నట్లు అధికారులు తెలిపారు. ఆమె కోసం పోలీసులు గాలింపు చర్యలు చేపట్టారు. ఈ ఘటనపై పూర్తి స్థాయిలో విచారణ జరిపిన దేవాదాయశాఖ అధికారులు తమ నివేదికను కమిషనర్‌కు పంపించారు. ఈవో భవానీ స్థానంలో కానూరు ప్రాంతానికి చెందిన మరో అధికారిని తాత్కాలికంగా నియమించినట్లు అధికారులు వెల్లడించారు. ఆలయ వ్యవహారాలపై మరింత పర్యవేక్షణ చేపట్టనున్నట్లు తెలిపారు.