మినిమం బ్యాలెన్స్ పేరుతో రూ.19 వేల కోట్లు వసూలు

• మూడేళ్లలో ప్రైవేట్ బ్యాంకులు రూ.11 వేల కోట్లు వసూలు
• ప్రభుత్వరంగ బ్యాంకులు రూ.8 వేల కోట్లు వసూలు
• పార్లమెంటులో కేంద్ర ఆర్థిక మంత్రి వెల్లడింపు

న్యూఢిల్లీ, 10 మార్చి (పీపుల్స్ మోటివేషన్) : బ్యాంకు ఖాతాల్లో కనీస నిల్వలు లేకపోవడం కారణంగా గత మూడేళ్లలో ప్రైవేట్ మరియు ప్రభుత్వరంగ బ్యాంకులు భారీగా ఛార్జీలు వసూలు చేసినట్లు కేంద్ర ప్రభుత్వం వెల్లడించింది. ఈ కాలంలో ప్రైవేట్ రంగ బ్యాంకులు ఖాతాదారుల నుంచి సుమారు రూ.11 వేల కోట్లు వసూలు చేసినట్లు కేంద్ర ఆర్థిక మంత్రి నిర్మలా సీతారామన్ పార్లమెంటుకు లిఖితపూర్వకంగా సమాధానం ఇచ్చారు. ఇదే సమయంలో ప్రభుత్వరంగ బ్యాంకులు కూడా రూ.8 వేల కోట్లు వసూలు చేసినట్లు తెలిపారు. ప్రైవేట్ రంగ బ్యాంకుల్లో హెచ్‌డీఎఫ్‌సీ బ్యాంకు అత్యధికంగా రూ.3,800 కోట్లు కనీస నిల్వల నిబంధన పేరుతో ఖాతాదారుల నుంచి వసూలు చేసినట్లు మంత్రి వివరించారు. ఆ తర్వాత యాక్సిస్ బ్యాంకు రూ.2,700 కోట్లు, ఐసీఐసీఐ బ్యాంకు రూ.1,200 కోట్ల చొప్పున వసూలు చేసినట్లు పేర్కొన్నారు. ఈ వివరాలు బ్యాంకింగ్ రంగంలో చర్చకు దారితీశాయి.

ప్రభుత్వరంగ బ్యాంకుల్లో పంజాబ్ నేషనల్ బ్యాంకు అత్యధికంగా రూ.1,500 కోట్లు వసూలు చేసినట్లు తెలిపారు. బ్యాంక్ ఆఫ్ బరోడా రూ.1,200 కోట్లు, ఇండియన్ బ్యాంకు రూ.1,100 కోట్ల చొప్పున కనీస నిల్వల ఛార్జీల రూపంలో వసూలు చేశాయని వెల్లడించారు. బ్యాంకుల విధానాలపై ఖాతాదారుల్లో చర్చలు కొనసాగుతున్నాయి.ఇక స్టేట్ బ్యాంక్ ఆఫ్ ఇండియా మాత్రం 2020 మార్చి నుంచి కనీస నిల్వలపై ఎలాంటి ఛార్జీలు వసూలు చేయడం లేదని మంత్రి తెలిపారు. గత ఏడాది నుంచి పంజాబ్ నేషనల్ బ్యాంకు, కెనరా బ్యాంకు కూడా ఈ ఛార్జీలను తొలగించినట్లు వెల్లడించారు. బ్యాంకింగ్ రంగంలో వినియోగదారులకు అనుకూల మార్పులు తీసుకురావాలని పలువురు నిపుణులు సూచిస్తున్నారు.