రైల్వే మౌలిక వసతుల అభివృద్ధికి ₹765 కోట్లు మంజూరు

- దువ్వాడ– విశాఖ– విజయనగరం మార్గంలో ట్రాక్షన్ అప్‌గ్రేడ్

- రాయచూర్–గుంటకల్ సెక్షన్‌కు కూడా నిధుల కేటాయింపు

- పశ్చిమ రైల్వేలో ఆప్టికల్ ఫైబర్ కమ్యూనికేషన్ విస్తరణ

11 మార్చి (పీపుల్స్ మోటివేషన్): దేశవ్యాప్తంగా రైల్వే మౌలిక వసతులను బలోపేతం చేసే దిశగా భారత రైల్వేలు కీలక నిర్ణయం తీసుకున్నాయి. మొత్తం రూ.765 కోట్ల విలువైన పలు అభివృద్ధి పనులకు ఆమోదం తెలిపాయి. ఇందులో భాగంగా ఆంధ్రప్రదేశ్‌లోని దువ్వాడ–విశాఖపట్నం–విజయనగరం రైల్వే మార్గంలో విద్యుత్ ట్రాక్షన్ వ్యవస్థను అప్‌గ్రేడ్ చేయనున్నారు. ఈ మార్గంలో ప్రస్తుతం ఉన్న 1×25 కిలోవోల్ట్ ట్రాక్షన్ వ్యవస్థను 2×25 కిలోవోల్ట్ వ్యవస్థగా మార్చేందుకు రూ.318.07 కోట్లను మంజూరు చేశారు. ఈ మార్పుతో సరుకు రవాణా సామర్థ్యం పెరగడంతో పాటు రైళ్ల వేగం మెరుగుపడే అవకాశం ఉందని అధికారులు తెలిపారు. దక్షిణ మధ్య రైల్వే పరిధిలోని రాయచూర్–గుంటకల్ రైల్వే సెక్షన్‌లో కూడా ట్రాక్షన్ వ్యవస్థను మెరుగుపరచేందుకు రూ.259.39 కోట్లను ఆమోదించారు. ఈ పనుల ద్వారా రైల్వే మార్గాల్లో విద్యుత్ సరఫరా సామర్థ్యం పెరిగి రవాణా సౌలభ్యం మెరుగుపడుతుందని రైల్వే అధికారులు పేర్కొన్నారు. ఇదే సమయంలో పశ్చిమ రైల్వే పరిధిలో వడోదర, ముంబై విభాగాలను కలుపుతూ సుమారు వెయ్యి రూట్ కిలోమీటర్ల మేర ఆప్టికల్ ఫైబర్ కమ్యూనికేషన్ నెట్‌వర్క్ విస్తరణకు రూ.187.88 కోట్లను కేటాయించారు. ఈ చర్యలతో రైల్వే సేవలు మరింత వేగవంతంగా, సురక్షితంగా మారనున్నాయని అధికారులు తెలిపారు.