కల్తీ పాలు ఘటనలో మరో చిన్నారి మృతి…

- రాజమహేంద్రవరం ఘటనతో విషాదం

- 23 రోజులుగా ఆసుపత్రిలో చికిత్స పొందిన చిన్నారి మృతి

- కల్తీ పాల ఘటనపై ఇంకా స్పష్టత లేదని విమర్శలు

రాజమహేంద్రవరం, 11 మార్చి (పీపుల్స్ మోటివేషన్):

రాజమహేంద్రవరం ప్రాంతంలో కల్తీ పాల ఘటన మరో విషాదాన్ని మిగిల్చింది. కల్తీ పాలు తాగి అస్వస్థతకు గురైన మూడేళ్ల చిన్నారి గరుగు జైక్రిత్ రాజ్ చికిత్స పొందుతూ మృతి చెందాడు. ఈ ఘటనతో కల్తీ పాల కారణంగా మృతుల సంఖ్య 12కి చేరింది.

సుమారు 23 రోజుల క్రితం కల్తీ పాలు తాగిన అనంతరం చిన్నారి అస్వస్థతకు గురైనట్లు కుటుంబ సభ్యులు తెలిపారు. వెంటనే అతన్ని స్థానిక ప్రైవేటు ఆసుపత్రికి తరలించి చికిత్స అందించారు. అయితే తీవ్ర స్థితిలో చికిత్స పొందుతున్న చిన్నారి చివరకు మృత్యువుతో పోరాడి ప్రాణాలు కోల్పోయాడు. ఈ ఘటనతో కుటుంబ సభ్యులు తీవ్ర విషాదంలో మునిగిపోయారు. చిన్నారి మృతితో స్థానికంగా ఆందోళన నెలకొంది. కల్తీ పాల ఘటనపై పూర్తి స్థాయి విచారణ జరిపి కారణాలను వెలికితీయాలని స్థానికులు డిమాండ్ చేస్తున్నారు. ఇప్పటివరకు మృతుల సంఖ్య 12కి చేరినా ఘటనకు సంబంధించిన అసలు కారణం ఇంకా పూర్తిగా వెల్లడ కాలేదని విమర్శలు వ్యక్తమవుతున్నాయి. అధికారులు దర్యాప్తు కొనసాగిస్తున్నట్లు సమాచారం.