రైతులతో ముచ్చటించిన హరీశ్ రావు

- గోపాలరావుపల్లిలో రైతుల ఆవేదన

- నీరు, యూరియా కొరతపై ఫిర్యాదులు

- రుణమాఫీ సమస్యలను ప్రస్తావించిన రైతులు

కరీంనగర్, 7 మార్చి (పీపుల్స్ మోటివేషన్): కరీంనగర్ జిల్లా చొప్పదండి నియోజకవర్గంలోని గోపాలరావుపల్లి గ్రామంలో మాజీ మంత్రి, బీఆర్ఎస్ ఎమ్మెల్యే హరీశ్ రావు రైతులతో సమావేశమయ్యారు. ఈ సందర్భంగా రైతులు తమ సమస్యలను వివరించి ఆవేదన వ్యక్తం చేశారు. సాగు నీటి కొరత, ఎరువుల సమస్య, విద్యుత్ సరఫరా లోపం వంటి అంశాలపై రైతులు తమ ఇబ్బందులను వివరించారు. ప్రభుత్వం సకాలంలో చెరువులు, కుంటలు నింపకపోవడం వల్ల పంటలకు నీరు అందక ఎండిపోతున్నాయని రైతులు తెలిపారు. కాల్వల్లో పూడిక తొలగించకపోవడం వల్ల నీటి సరఫరా సరిగా లేదని పేర్కొన్నారు. భూగర్భ జలాలు తగ్గిపోవడంతో సాగు చేయడం కష్టమైందని, అప్పులు చేసి బావుల్లో పూడిక తీయాల్సి వస్తోందని రైతులు తెలిపారు.

యూరియా ఎరువుల సరఫరాలో కూడా సమస్యలు ఎదురవుతున్నాయని రైతులు చెప్పారు. ఎరువులు పొందేందుకు ఓటీపీ విధానం అమలు చేస్తున్నప్పటికీ చాలామందికి మొబైల్ ఫోన్లు లేకపోవడం, చదువు రాకపోవడం వల్ల ఇబ్బందులు పడుతున్నామని పేర్కొన్నారు. యూరియా కోసం క్యూలలో నిలబడాల్సి వస్తోందని వారు తెలిపారు. రుణమాఫీ విషయంలో కూడా సమస్యలు ఉన్నాయని రైతులు పేర్కొన్నారు. తమ గ్రామంలో సుమారు 70 మంది రైతులకు రుణమాఫీ కాలేదని వినతిపత్రం ఇచ్చారు. గతంలో రైతు బంధు పథకం సకాలంలో అందేదని, ప్రస్తుతం ఆర్థిక సహాయం ఆలస్యమవుతోందని రైతులు ఆవేదన వ్యక్తం చేశారు. గ్రామంలో సాగు నీటి కొరత, బోర్లు పడకపోవడం, కరెంట్ సరఫరా లోపం వంటి సమస్యలను కూడా రైతులు వివరించారు. ఈ సమస్యలను బడ్జెట్ సమావేశాల్లో ప్రస్తావించాలని రైతులు హరీశ్ రావును కోరారు. రైతుల సమస్యలను ప్రభుత్వ దృష్టికి తీసుకెళ్లాలని వారు విజ్ఞప్తి చేశారు.