ఇన్‌స్టా పరిచయాలు.. పిల్లలపై తల్లిదండ్రుల నిఘా అవసరం

• సోషల్ మీడియాలో పరిచయాలతో ఇల్లు విడిచి వెళ్లే ఘటనలు
• విశాఖ యువతి తిరుపతికి వెళ్లే ప్రయత్నం
• అప్రమత్తమైన పోలీసులు యువతిని తల్లిదండ్రులకు అప్పగింత

మార్చి 4 (పీపుల్స్ మోటివేషన్): చిన్న వయసులోనే సామాజిక మాధ్యమాల ద్వారా ఏర్పడుతున్న పరిచయాలు యువతను తప్పుదోవ పట్టిస్తున్నాయని పోలీసులు హెచ్చరిస్తున్నారు. ముఖ్యంగా ఇన్‌స్టాగ్రామ్ వంటి వేదికల్లో పరిచయమైన వ్యక్తుల కోసం కొందరు యువతీ యువకులు ఇల్లు విడిచి వెళ్లే ఘటనలు పెరుగుతున్నాయని తెలిపారు. తాజాగా విశాఖపట్నానికి చెందిన ఓ యువతి ఇన్‌స్టాగ్రామ్‌లో పరిచయమైన యువకుడిని పెళ్లి చేసుకోవడానికి తిరుపతికి వెళ్లేందుకు సిద్ధమైంది. ఇంటర్ పరీక్ష రాసిన అనంతరం ఉచిత బస్సుల్లో ప్రయాణిస్తూ కావలి వరకు చేరుకుంది. అర్ధరాత్రి సమయంలో అనుమానాస్పదంగా తిరుగుతున్న యువతిని పోలీసులు గుర్తించి ఆరా తీశారు. ఆమె పరిస్థితిని తెలుసుకున్న పోలీసులు వెంటనే అప్రమత్తమై యువతిని అదుపులోకి తీసుకున్నారు. అనంతరం ఆమె తల్లిదండ్రులకు సమాచారం ఇచ్చి వారి వద్దకు అప్పగించారు.

సామాజిక మాధ్యమాల్లో ఎక్కువ సమయం గడిపే పిల్లలపై తల్లిదండ్రులు ప్రత్యేకంగా నిఘా ఉంచాలని పోలీసులు సూచిస్తున్నారు. అపరిచితులతో పరిచయాలు పెంచుకోవడం వల్ల ఇలాంటి ఘటనలు జరుగుతున్నాయని హెచ్చరిస్తున్నారు.