ఉపాధ్యాయుడిపై పదో తరగతి విద్యార్థి దాడి

• దుర్భాషలాడిన ఉపాధ్యాయుడితో వివాదం
• పిడిగుద్దులు కురిపించిన విద్యార్థి
• వీరవల్లి జిల్లా పరిషత్ పాఠశాలలో ఘటన

ఎన్టీఆర్ జిల్లా, మార్చి 4 (పీపుల్స్ మోటివేషన్): ఎన్టీఆర్ జిల్లాలోని బాపులపాడు మండలం వీరవల్లి జిల్లా పరిషత్ హై స్కూల్‌లో ఉపాధ్యాయుడిపై పదో తరగతి విద్యార్థి దాడి చేసిన ఘటన కలకలం రేపింది. పాఠశాలలో జరిగిన చిన్న విషయంపై ఉపాధ్యాయుడు, విద్యార్థి మధ్య వాగ్వాదం చోటుచేసుకున్నట్లు సమాచారం. ఈ సందర్భంగా ఉపాధ్యాయుడు విద్యార్థిని దుర్భాషలాడినట్లు ఆరోపణలు ఉన్నాయి. దీంతో ఆగ్రహానికి గురైన విద్యార్థి ఉపాధ్యాయుడిపై పిడిగుద్దులు కురిపించినట్లు తెలుస్తోంది.

ఈ ఘటనతో పాఠశాలలో కొంతసేపు ఉద్రిక్త పరిస్థితులు నెలకొన్నాయి. విషయం తెలిసిన పాఠశాల సిబ్బంది వెంటనే పరిస్థితిని అదుపులోకి తీసుకొచ్చారు. ఈ ఘటనపై అధికారులు విచారణ చేపట్టినట్లు సమాచారం. పాఠశాలలో జరిగిన ఈ ఘటనపై తగిన చర్యలు తీసుకుంటామని విద్యాశాఖ అధికారులు తెలిపారు.