రైతులకు పూర్తి రుణమాఫీ లేదు: కేంద్రం స్పష్టం

• పార్లమెంట్‌లో ఆర్థిక మంత్రి ప్రకటన
• కిసాన్ క్రెడిట్ కార్డ్ ద్వారా రాయితీ రుణాలు
• వైకల్య సైనికుల పింఛన్‌పై పన్ను మినహాయింపు కొనసాగింపు

న్యూఢిల్లీ, మార్చి 23 (పీపుల్స్ మోటివేషన్): రైతులకు పూర్తి రుణమాఫీపై ఎలాంటి ప్రతిపాదన ప్రస్తుతం కేంద్ర ప్రభుత్వ పరిశీలనలో లేదని ఆర్థిక మంత్రి నిర్మలా సీతారామన్ పార్లమెంటులో స్పష్టం చేశారు. అయితే రైతుల ఆర్థిక పరిస్థితిని బలోపేతం చేయడానికి కేంద్రం పలు కీలక చర్యలు చేపడుతోందని తెలిపారు. ముఖ్యంగా కిసాన్ క్రెడిట్ కార్డ్ ద్వారా రైతులకు సకాలంలో తగిన రుణం అందిస్తున్నామని పేర్కొన్నారు.

కిసాన్ క్రెడిట్ కార్డ్ పథకం కింద రూ.3 లక్షల వరకు పంట రుణాన్ని రాయితీ వడ్డీ రేట్లకు అందిస్తున్నామని మంత్రి వెల్లడించారు. సవరించిన వడ్డీ రాయితీ పథకం కింద సకాలంలో రుణం తిరిగి చెల్లించే రైతులకు అదనపు ప్రోత్సాహకాలు కూడా ఇస్తున్నామని తెలిపారు. అలాగే పూచీకత్తు లేని స్వల్పకాలిక వ్యవసాయ రుణాల పరిమితిని రూ.1.60 లక్షల నుంచి రూ.2 లక్షలకు పెంచినట్లు చెప్పారు. వ్యవసాయ రంగానికి తగిన రుణ ప్రవాహం ఉండేలా బ్యాంకింగ్ వ్యవస్థను బలోపేతం చేస్తున్నామని కేంద్రం పేర్కొంది. ప్రధాన మంత్రి కిసాన్ సమ్మాన్ నిధి పథకం ద్వారా రైతులకు నేరుగా నగదు బదిలీతో పాటు పంటల బీమా సౌకర్యం కల్పిస్తున్నట్లు వెల్లడించింది. ఈ చర్యల ద్వారా రైతుల ఆదాయాన్ని పెంచడమే లక్ష్యమని ప్రభుత్వం స్పష్టం చేసింది. ఇక సాయుధ దళాల సిబ్బందికి సంబంధించిన అంశాలపై కూడా మంత్రి సమాధానం ఇచ్చారు. వైకల్యంతో సేవల నుంచి వైదొలిగిన సైనికుల పింఛన్‌పై ఆదాయపు పన్ను మినహాయింపును కొనసాగిస్తున్నామని స్పష్టం చేశారు. కొత్త ఆదాయపు పన్ను చట్టంలో కూడా ఈ మినహాయింపు కొనసాగించేలా నిబంధనలు చేర్చినట్లు వివరించారు. వైద్య పరీక్షల ఆధారంగా సైనికుల ఆరోగ్య పరిస్థితిని అంచనా వేసి, అవసరమైతే సేవల నుంచి తొలగించి పింఛన్ అందజేస్తామని తెలిపారు.