యాదాద్రిలో దారుణం 

• సపోటా పండులో విషం పెట్టి చిన్నారిని హత్య చేసిన తండ్రి
• కుటుంబ కలహాలే ఘోరానికి కారణం
• విషపూరిత పండు తినిపించి కూతురిని హతమార్చిన తండ్రి
• పోలీసుల కేసు నమోదు, దర్యాప్తు ప్రారంభం

యాదాద్రి, మార్చి 24 (పీపుల్స్ మోటివేషన్): తెలంగాణ రాష్ట్రం యాదాద్రి జిల్లాలో హృదయ విదారక ఘటన వెలుగులోకి వచ్చింది. సంస్థాన్‌నారాయణపురం మండలం లచ్చలగూడెం గ్రామంలో ఒక తండ్రి సపోటా పండులో ఎలుకల మందు కలిపి తన చిన్నారిని హతమార్చిన ఘటన తీవ్ర కలకలం రేపింది. మూడు రోజుల క్రితం జరిగిన ఈ సంఘటన ఆలస్యంగా బయటపడింది. పోలీసుల వివరాల ప్రకారం, వరికుప్పల రవి అనే వ్యక్తికి మూడు సంవత్సరాల క్రితం స్వాతితో వివాహం జరిగింది. వీరికి రెండేళ్ల మేఘన, తొమ్మిది నెలల మయూరి అనే ఇద్దరు ఆడపిల్లలు ఉన్నారు. కుటుంబ కలహాల నేపథ్యంలో స్వాతి తన చిన్న కూతురితో పుట్టింట్లో ఉండగా, పెద్ద కూతురు మేఘన తండ్రి వద్దే ఉంది. పెద్ద కూతురిని తన వద్దకు పంపాలని స్వాతి పలుమార్లు కోరినా, రవి అంగీకరించలేదు.

ఈ వివాదంపై స్వాతి మాడ్గులపల్లి పోలీస్ స్టేషన్‌లో ఫిర్యాదు చేయడంతో పోలీసులు రవిని పిలిపించి మాట్లాడారు. ఈ సమస్యను పెద్దల సమక్షంలో పరిష్కరించాల్సి ఉండగా, రవి మాత్రం కడతేర్చే దారుణ నిర్ణయం తీసుకున్నాడు. శనివారం సపోటా పండులో ఎలుకల మందు కలిపి తన కూతురికి తినిపించాడు. విషం ప్రభావంతో చిన్నారి కొద్దిసేపటిలోనే వాంతులు చేసుకుని అపస్మారక స్థితిలోకి వెళ్లింది. విషయం బయటపడుతుందనే భయంతో రవి కూడా నిద్రమాత్రలు, ఎలుకల మందు తీసుకున్నాడు. కుటుంబ సభ్యులు వెంటనే ఇద్దరినీ ఆసుపత్రికి తరలించగా, చిన్నారిని నీలోఫర్ ఆసుపత్రిలో చేర్చినా చికిత్స పొందుతూ మృతి చెందింది. ఈ ఘటనపై తల్లి స్వాతి ఫిర్యాదు చేయడంతో పోలీసులు కేసు నమోదు చేసి దర్యాప్తు ప్రారంభించారు. కుటుంబ కలహాలు ఎంతటి దారుణాలకు దారి తీస్తాయో ఈ సంఘటన స్పష్టంగా చూపిస్తోందని స్థానికులు ఆవేదన వ్యక్తం చేస్తున్నారు.