అమరావతిలో పసుపు పూల సోయగం.. టెకోమా గాడి చౌడి అందాల హరివిల్లు

- ఎన్–9 రహదారిపై ప్రకృతి రంగుల పండుగ

- రాజధానికి ప్రత్యేక ఆకర్షణగా మారిన పసుపు పూల వరుసలు

- ప్రపంచ స్థాయి నగరంగా తీర్చిదిద్దే దిశగా పచ్చదనం

అమరావతి, మార్చి 18 (పీపుల్స్ మోటివేషన్): ప్రజా రాజధాని అమరావతిలో ప్రకృతి అందాలు నగర సౌందర్యాన్ని మరింత పెంచుతున్నాయి. సీడ్ యాక్సెస్ జంక్షన్ నుంచి రాష్ట్ర సచివాలయానికి వెళ్లే ఎన్–9 రహదారిపై టెకోమా గాడి చౌడి పూల చెట్లు విరబూసి పసుపు రంగు సోయగాలతో అందరినీ ఆకట్టుకుంటున్నాయి. రహదారి మధ్యనున్న సెంట్రల్ మీడియన్ డివైడర్లపై వరుసగా పెరిగిన ఈ చెట్లు పసుపు పూలతో కళకళలాడుతూ ప్రయాణికులకు ప్రత్యేక అనుభూతిని కలిగిస్తున్నాయి. రాజధానికి వచ్చే ప్రతి ఒక్కరికీ ఈ పూల వరుసలు ప్రకృతి అందాలను గుర్తు చేస్తూ ఆహ్లాదాన్ని పంచుతున్నాయి.

ప్రతిరోజూ రాష్ట్ర సచివాలయానికి వెళ్లే సమయంలో ఈ పూల అందాలు ఎంతో ఆహ్లాదకరంగా కనిపిస్తాయని రాష్ట్ర ముఖ్యమంత్రి నారా చంద్రబాబు నాయుడు ఇటీవల జరిగిన కలెక్టర్ల సమావేశంలో ప్రస్తావించారు. నగర అభివృద్ధిలో ప్రకృతి సౌందర్యం కూడా కీలక భాగమని ఆయన పేర్కొన్నారు. అమరావతిని ప్రపంచ ప్రఖ్యాత స్థాయి రాజధానిగా తీర్చిదిద్దాలంటే ఇలాంటి పచ్చదనం, ప్రకృతి అందాలు అవసరమని ఆయన వివరించారు. పూలతో నిండిన రహదారులు నగరానికి కొత్త గుర్తింపును తీసుకొస్తాయని కూడా చెప్పారు. అమరావతి అభివృద్ధి సంస్థ అధికారులు ఎన్–9 రహదారిలోని రెండు సెంట్రల్ మీడియన్ డివైడర్లపై ఈ టెకోమా గాడి చౌడి పూల మొక్కలను నాటించి సంరక్షిస్తున్నారు. నగరాన్ని అందంగా తీర్చిదిద్దే క్రమంలో పచ్చదనాన్ని పెంచేందుకు ప్రత్యేక ప్రణాళికలు అమలు చేస్తున్నారు. నగరంలోని ప్రధాన రహదారుల వెంట పూల మొక్కలు, అలంకార చెట్లు పెంచడం ద్వారా రాజధానికి ప్రత్యేకమైన అందాన్ని అందించేందుకు చర్యలు తీసుకుంటున్నారు. ఈ పూల చెట్లు పెరిగి విరబూయడంతో ప్రస్తుతం రహదారి మొత్తం పసుపు రంగు పూలతో కళకళలాడుతోంది.

అభివృద్ధి సంస్థ ఛైర్‌పర్సన్ డి లక్ష్మీ పార్థసారథి సూచనల మేరకు గ్రీనరీ విభాగం అధికారులు ఈ పూల మొక్కలను ప్రత్యేకంగా సంరక్షిస్తున్నారు. కడియం నర్సరీల నుంచి తీసుకువచ్చిన హైబ్రీడ్ మొక్కలు కావడంతో ఇవి త్వరగా పెరిగి విరివిగా పూలు పూస్తున్నాయి. సరైన సంరక్షణతో ఈ చెట్లు మరింత విస్తరించి అమరావతి నగరానికి ప్రకృతి అందాలను మరింతగా తీసుకువస్తాయని అధికారులు తెలిపారు. రాజధాని అభివృద్ధిలో పచ్చదనం కీలక పాత్ర పోషిస్తుందని పేర్కొంటూ నగరాన్ని అందంగా, ఆహ్లాదకరంగా తీర్చిదిద్దే కార్యక్రమాలు కొనసాగుతున్నాయని వెల్లడించారు.