హైకోర్టులో భద్రతా లోపం.. నలుగురు పోలీసులు సస్పెండ్

- కోర్టు హాలులోకి పిండంతో ప్రవేశించిన పిటిషనర్

- జబల్‌పూర్ హైకోర్టు బెంచ్‌లో సంచలనం

- ఏఎస్ఐ సహా నలుగురిపై కఠిన చర్యలు

జబల్‌పూర్, 10 మార్చి (పీపుల్స్ మోటివేషన్):

మధ్యప్రదేశ్ హైకోర్టు జబల్‌పూర్ బెంచ్‌లో జరిగిన తీవ్ర భద్రతా వైఫల్యంపై అధికారులు కఠిన చర్యలు తీసుకున్నారు. కోర్టు ప్రాంగణంలో భద్రతా లోపం ఆరోపణలపై ఒక అసిస్టెంట్ సబ్ ఇన్‌స్పెక్టర్ సహా నలుగురు పోలీసు సిబ్బందిని మంగళవారం సస్పెండ్ చేశారు. ఒక పిటిషనర్ కోర్టు హాలులోకి పిండంతో ప్రవేశించిన ఘటన తర్వాత ఈ నిర్ణయం తీసుకోవడం గమనార్హం.

సోమవారం జరిగిన ఈ ఘటనలో రేవా జిల్లాకు చెందిన దయాశంకర్ పాండే అనే వ్యక్తి తన పిటిషన్ విచారణ కోసం హైకోర్టుకు వచ్చాడు. గేట్ నంబర్-6 ద్వారా కోర్టు ప్రాంగణంలోకి ప్రవేశించి జస్టిస్ హిమాన్షు జోషి కోర్టు హాలులోకి వెళ్లాడు. విచారణ జరుగుతున్న సమయంలో తన బ్యాగులో నుంచి ఒక పిండాన్ని తీసి న్యాయమూర్తి వేదికపై ఉంచి తనకు న్యాయం చేయాలని కోరాడు. ఈ ఘటనతో కోర్టు హాలులో ఒక్కసారిగా కలకలం రేగింది. పోలీసులు విచారణ చేపట్టగా అది అతని భార్యకు గర్భస్రావం కావడంతో మృతిచెందిన పిండమని వెల్లడైంది. ఈ సంఘటన కోర్టు భద్రతపై తీవ్రమైన ప్రశ్నలు లేవనెత్తింది. ఈ ఘటనను తీవ్రంగా పరిగణించిన జబల్‌పూర్ ఎస్పీ సంపత్ ఉపాధ్యాయ భద్రతా వైఫల్యానికి బాధ్యులని భావిస్తూ నలుగురు పోలీసులను సస్పెండ్ చేశారు. సస్పెండ్ అయిన వారిలో ఏఎస్ఐ మున్నా అహిర్వార్, హెడ్ కానిస్టేబుళ్లు బ్రహ్మదత్ ఖత్రీ, అరుణ్ ఉపాధ్యాయ, కానిస్టేబుల్ ప్రతీక్ సోంకర్ ఉన్నారు. దయాశంకర్ పాండే తన కుటుంబంపై గుర్తుతెలియని వ్యక్తులు దాడులు చేస్తున్నారని, స్థానిక పోలీసులకు పలుమార్లు ఫిర్యాదు చేసినా చర్యలు తీసుకోలేదని ఆరోపిస్తూ హైకోర్టులో పిటిషన్ దాఖలు చేశాడు. అదే పిటిషన్ విచారణ రోజే ఈ ఘటన చోటుచేసుకోవడం మరింత చర్చనీయాంశంగా మారింది.