గుంటూరు కలెక్టరేట్‌లో వృద్ధుడి ఆత్మహత్యాయత్నం

• ఇంటి ఆక్రమణ ఆరోపణలతో పెట్రోల్ పోసుకుని ఆందోళన
• ఫిర్యాదు చేసినా స్పందన లేదని ఆవేదన
• అప్రమత్తమైన స్థానికులు, పోలీసులు అడ్డుకట్ట

గుంటూరు, మార్చి 2 (పీపుల్స్ మోటివేషన్): గుంటూరు కలెక్టరేట్‌లో ఉద్రిక్త పరిస్థితులు నెలకొన్నాయి. తన ఇంటిని అక్రమంగా ఆక్రమించారంటూ వృద్ధుడు దాసరి పాపయ్య పెట్రోల్ పోసుకుని ఆత్మహత్యాయత్నానికి ప్రయత్నించడం కలకలం రేపింది. ఘటనాస్థలంలో ఉన్న స్థానికులు, పోలీసులు అప్రమత్తంగా వ్యవహరించి అతని చేతిలోని పెట్రోల్ సీసాను లాక్కొని పరిస్థితిని అదుపులోకి తీసుకువచ్చారు. ఫిరంగిపురం పోలీసులకు పలుమార్లు ఫిర్యాదు చేసినప్పటికీ ఎలాంటి చర్యలు తీసుకోలేదని పాపయ్య ఆవేదన వ్యక్తం చేశారు. తన ఇంటిని అక్రమంగా రిజిస్ట్రేషన్ చేసుకున్నారని, న్యాయం కావాలని కలెక్టరేట్‌కు వచ్చానని తెలిపారు. అధికారుల నిర్లక్ష్యం కారణంగా ఈ దశకు వచ్చానని వృద్ధుడు ఆరోపించారు. ఘటనతో కలెక్టరేట్ పరిసరాల్లో కొంతసేపు ఉద్రిక్తత నెలకొంది. పోలీసులు పాపయ్యను ప్రశాంతంగా మాట్లాడించి అదుపులోకి తీసుకున్నారు. అతని ఫిర్యాదుపై సమగ్ర విచారణ జరిపి తగిన చర్యలు తీసుకుంటామని అధికారులు తెలిపారు. ఆత్మహత్యాయత్నం వంటి చర్యలకు దిగకుండా సమస్యలను చట్టపరంగా పరిష్కరించుకోవాలని పోలీసులు సూచించారు.